Djasabra anochi ACE Foundation a sera e siman ku un konsierto espectacular titulá “Soño sa bira realidat”. Un total di 15 mucha a subi riba podio na Creative World den Tera Cora pa duna un presentashon inolvidabel. E highlight di e anochi tabata J-Sync Music yunan di e legendario Xemio Jacobs, ku a presenta un show varia ku kantika nobo i hitnan lokal manera “Indjan Arowak”. ACE Teens di Boneiru i e rumannan Jacobs a briya den nan presentashon.
E publiko a reakshona ku hopi emoshon riba e presentashon talentoso di nos hobennan.
Tabata hopi bunita pa mira kon e dos kulturanan di hobennan yu di Korsou i di Boneiru por a uni i den dos dia prepara un bunita show huntu. Promé ku e show prinsipal, tres hoben kualnan ta Eithrich Torregrossa, Shendrick Smith i Fari Domacasse a presenta nan kantika nobo nobo ku nan a krea kombina ku rap i spoken word.
Nan a krea e kantikanan den un siman di tempu. Ademàs, e hobennan di Gang di arte, a traha instrument di material resiklá i kreashon di paña basá riba e tema soña. Skolnan tambe a tuma parti aktivamente den tur klase di tarea ku a keda manda pa skolnan i dosentenan aktivamente a hasi uso di esakinan pa e muchanan por tabata envolvi ku musika hinter e siman pero tambe ku e tema Soña i mucha mester tende kantika di mucha.
Tabata tin skol ku a enfoka riba baila, otronan a kanta i te asta sigui tayernan di ritmo i otro ku a traha instrument resikla. Loke si ta di lamenta ku pa motibu di falta di fondo, ACE Foundation no a logra organisa e siman di un manera mas grandi. Nan a rema ku e manera ku tabata por.
Na un manera kreativo a soru pa toch por a hasi algu i pone atenshon riba e importasha di musika den bida di nos muchanan. ACE ta spera ku pa otro aña, Gobiernu lo duna sosten total i dekreta Siman di Muzik komo un siman ofisial pa e isla henter.
Den mesun spiritu, ACE a lansa un kampaña titulá “Mucha mester tende kantika di mucha”, ku ta enfoká riba protehá desaroyo sano di mucha dor di muzik apropia. ACE ta bai sigui stimula kompositornan lokal pa krea mas kantika pa mucha. Pa por aporta na e echo ku mucha mester tende kantika di mucha ACE Foundation ta introdusí Kiddie Beats Radio, un radio online netamente pa mucha i su famia. Bo por skucha via Zeno app riba telefon, tablet of televishon.
ACE Foundation e anja aki ta selebrá 5 aña i ta kontinua ku e meta pa kontribuí kontinuamente na desaroyo di mucha via arte i kultura. Un danki ta bai na MCB Bonaire, Fundashon Wega di number Bonaire, Fonds Cultuur Participatie, Cultuurfonds Caribisch Gebied, Samenwerkende Fondsen, Entidat Publiko Boneiru i Oranje Fonds. Danki tambe na tur radio ku a kontribui pa laga muchanan skucha kantika di mucha. Spesialmente Live 99.9 i Breezy FM.
