E tim di cybercrime di Kuerpo Polisial Hulanda Karibense ta atvertí habitantenan di Boneiru pa un flyer sospechoso ku ta sirkulá aktualmente. Riba e flyer tin e título “Security Survey” i un “QR-code”, manera por mira den e imágen.
No skèn e “QR-code”
E orígen di e anunsio te na e momentu aki ta deskonosí. No por deskartá ku dor di skèn e “QR-code” esaki lo por kondusí den deskargá di “malware” òf otro “software” dañino. Tambe tin e posibilidat ku ta usa e kódigo pa kolektá datonan personal òf pa prepará aktividatnan kriminal.
Bo a skèn e QR-code kaba? Paga tinu ku e siguiente señalnan:
Aplikashonnan deskonosí ku diripiente ta riba bo telefòn
“Pop-ups” òf propaganda ku bo no sa risibí
Un telefòn notabelmente mas lento
Uso di bateria òf data inusual
Página riba internèt òf aplikashonnan ku ta habri outomátikamente
Notifikashon di intento di ‘log-in’ riba bo kuentanan
Kambio den konfigurashon òf kódigo sin bo pèrmit
Kiko bo por hasi si bo nota e señalnan aki?
Pone bo aparato temporalmente den ‘airplane mode’.
Instalá un app di “antivirus” konfiabel.
Kita tur aplikashon deskonosí.
Kambia kódigo di kuentanan importante.
Tuma kontakto ku un spesialista di IT òf mèldu na polis.
Si resultá ku e anunsio ta bini di un fuente legítimo, nos ta pidi e partido responsabel pa mèldu su mes ku urgensia na outoridatnan.
Keda alerta i kompartí e mensahe aki ku bo alrededor. Huntu nos ta sòru pa un komunidat seif