For di 5 di sèptèmber mas òf ménos 40 empleado for di e kadena di dunamentu di ayudo semanalmente ta sigui lès di spañó pa por komuniká mas mihó ku habitantenan ku ta papia spañó. E grupo di dunadó di ayudo ta konsistí di empleadonan di Sentro Akseso Boneiru, Kuido i Hubentut Hulanda Karibense, Asistensia di práktika di Dòkternan di Kas, Grupo di Kuido i Bienestar (ZW-Groep), Konseho di Tutela (Voogdijraad), Kuerpo Polisial Hulanda Karibense i akohida pa hende muhé Tabitha di Fundashon Krusada. Pa bai sigui lès di spañó tabata un deseo di empleadonan for di e kadena di dunamentu di ayudo i Entidat Públiko Boneiru ta organisá esaki.
E lèsnan di spañó pa dunadónan di ayudo ta forma un parti importante di e Akuerdo Atministrativo ‘Aserkamentu di Violensia Doméstiko i Maltrato di Mucha Hulanda Karibense’ ku ministerio di Salubridat Públiko, Bienestar i Deporte (VWS) i e entidatnan públiko a firma. Un di e puntonan di salida di e akuerdo atministrativo ku VWS por sierto ta mehorashon di dunamentu di servisio i ekspertisio den e kadena di dunamentu di ayudo. Pa medio di komuniká mas mihó na spañó e dunadónan di ayudo por duna mihó servisio na habitantenan ku ta papia spañó.
E grupo di dunadó di ayudo ta repartí den 3 grupo di prinsipiante i 1 grupo di personanan ku ta avansá kaba den e materia. Delta Academy ta duna e kapasitashon i na luna di desèmber nan ta finalis’é ku un prueba.