E siman akí Entidat Públiko Boneiru a kuminsá atendé ku e fokonan di kandela na lèntfel Lagun. Esaki ta tuma lugá huntu ku Selibon i Afvalzorg. E fokonan di kandela ta bou di tera i nan a resta despues di e kandelanan grandi di e último lunanan.
Aunke e kandelanan akí ta chikitu awor akí, tòg Entidat Públiko Boneiru ta atendé mesora ku nan. Di e manera akí Entidat Públiko Boneiru ke logra pa e situashon na e lèntfel ta seif i bou di kontròl atrobe. Despues di esei por sigui traha riba mehorashon di maneho di e sitio pa depositá sushi.
A kompartí informashon ku e bisindario
Dia 24 di yüni 2025 tabatin un enkuentro (un asina yamá ‘townhall meeting’) kaminda nan a duna splikashon di e plan na habitantenan di e bisindario i otro interesadonan. Durante e enkuentro akí e hendenan a haña informashon klarito i aktual tokante e trabounan planiá. Tambe nan por a hasi pregunta.
Traha na un manera seif
Durante un kontròl anterior, nan a haña mas òf ménos 15 foko di kandela. Nan a investigá esakinan ku midimentu di temperatura i kámara infrakòrá. Asina nan sa eksaktamente na unda e kandelanan ta i kon grandi nan ta.
Nan ta atendé na un manera seif i trankil ku e fokonan di kandela, i nan ta traha solamente entre 8 or di mainta i 3 or di tramèrdia. Di e manera akí tin ménos molèster posibel pa e bisindario.
E trabounan ta kuminsá na e parti kaminda tin konstrukshon i paso pa paso nan ta bai den direkshon di entrada di e lèntfel. E sistema di atendé ku e kandelanan ta konsistí di koba, paga dirigí ku awa i tapa e sitionan ku greis. E método akí ta sòru pa e riesgonan keda chikitu.
Entidat Públiko Boneiru ta traha tambe riba un mihó prosesamentu di shushi
Banda di pagamentu di e fokonan di kandela, Entidat Públiko Boneiru ta trahando tambe riba mehorashonnan permanente den maneho di shushi. Di e manera akí nan ke evitá kandela nobo den futuro. Ta bini mas atenshon pa prosesamentu rápido òf almasenamentu seif di desperdisio peligroso, manera tayer i plèstik.
Tin molèster? Tuma kontakto
Hendenan ku durante e trabounan tin molèster di huma, holó òf algu otro, por tuma kontakto ku Entidat Públiko Boneiru. Number di telefòn: +599 717 8580