Aruba Hotel & Tourism Association (AHATA) tur luna ta acumula e cifranan di ocupacion y prijs di hotelnan. Den e cifranan di Juni, Presidente y CEO di AHATA, Tisa LaSorte, ta nota cu tin un patronchi nobo.
Pa di dos luna consecutivo e cifras ta indica cu RevPAR (entrada averahe pa camber disponibel) di hotel na Aruba a stagna. E inventario di camber di hotel y di condominio na Aruba a crece pero e cantidad di turista cu ta skohe pa estadia na hotel no a crece. Aunque ADR (prijs di kamber) ainda ta un tiki mas halto cu añanan anterior, e ocupacion averahe na hotel ta bahando. Cobrando un prijs mas halto, e hotel ainda por mantene un nivel di entrada cu ta sostene empleo, inversion, gastonan creciente, y entrada pa e inversionista.
Na Juni, e RevPAR tabata $256.61 cu ta casi mescos cu e aña anterior. Na Mei a experiencia mesun resultado sin crecemento, confirmando asina e patronchi cu RevPAR a stop di crece. Gastonan di empresa a subi den ultimo añanan, locual ta subraya e importancia di mantene un RevPAR saludabel. E exito di nos sector turistico ta traduci su mes directamente den seguridad economico pa hopi famia Arubano, y ta contribui na fondonan esencial pa servicionan publico y sosten pa negoshinan local.
Den ultimo lunanan a nota un rebaho den demanda pa reservacion for di Merca pa resto di aña. E proyeccion original pa ocupacion averahe di hotel na 2025 tabata 81%. Luna pasa e proyeccion a baha te 76.4%, y e luna aki ela sigui baha un tiki pa yega 75.8%.
