Esaki relashoná ku ola di kriminalidat na Boneiru
Sr. Fitszgerald Martina, miembro di direktiva di M21, ta ekspresá su preokupashon i malkontentu ku e forma di atendé ku e problema di oumento di kriminalidat – primordialmente entre nos hóbennan – na Bonaire. Sr. Martina ta puntra ta ki dia gezaghèber, hefe di kuerpo polisial i fiskal ta lanta for di soño i kuminsá implementá medida mas severo pa por atendé ku e kriminalidat, ku dia pa dia ta asotando nos isla mas i mas i tiki tiki ta tumando nos isla over. No tin rèspèt mas ni pa otro, tampoko pa outoridat. Outoridat no por aktua manera mester ta, pasobra nan mannan ta mará ku e diferente leinan lali lali ku tin awendia i pa kolmo no tin sufisiente hende den Kuerpo Polisial Hulanda Karibense pa por atendé ku e situashon ku mas dedikashon i mas determinashon. Ta kon ta hasi pone i mantené òrdu si no tin sufisiente personal kapasitá pa hasi esaki? A emití un dekreto pa kontrolá den e supuesto áreanan di riesgo. Dikon no ta kontrolá den e barionan? A lubidá riba siguridat di nos hendenan den bario? Dikon no ta kontrolá tur e hòtspòtnan di riesgo haltu di kada bario? Ki dia ta kuminsá ku akshon ku ta duna resultado mesora i a korto plaso? I kuminsá mesora ku akshon pa logronan a largo plaso tambe. Nos no mester sinta warda malora toka mas hende su porta; nos mester aktua awor.
Ehekushon urgente di moshon
Dia 12 di yüni último, Konseho Insular a aprobá unánimemente un Desishon di Konseho Insular, prepará pa entre otro sra. Daisy Coffie. Sinembargo gezaghèber a proponé pa kambia e Desishon di Konseho Insular den un moshon. Pakiko a kambia e Desishon di Konseho Insular den un moshon? Un moshon ta un deseo i mesun gezaghèber ku a proponé e moshon akí, por pon’é den lachi si e no ta deseá di ehekut’é, ya ku e ta un deseo sin ningun garantia di ehekushon. Lo ta bon pa Konseho Insular chèk ku gezaghèber kiko tur di e moshon a hasi kaba òf ta hasiendo, pasobra vários punto den e Desishon di Konseho Insular ku a bira moshon ei ta puntonan al kaso ku inmediatamente mester ehekutá òf implementá ku hopi urgensia.
Asistensia pa kuerpo polisial
Despues di e insidente dilanti un klup nokturno konosí den Playa a bin ku yen di medida, entre nan a para diferente aktividat miéntras no ta atendiendo ku e barionan kaminda orígen di vários kaso ta. A tene reunion di importansia ku ZJCN: ta kumpli ku loke a palabra ku nan, òf ta pa djis e momentum, pa show a hasié? Nos kuerpo polisial mester di yudansa; kon ta pará ku VKB, e kuerpo di boluntario? Ta hasiendo algu pa rebibá esaki? Ke tal di polis di bario; kon aktivo esakinan ta den nos barionan i ku ki resultado? Dikon ta manda tantu polis pa reforsá otro islanan, i no ta buska mas refuerso pa nos mes? Nos a komprendé ku mitar kuerpo polisial tin ku sigui entrenamentu i no por subi kaya. Esaki tambe ta un rason pa buska refuerso pa nos kuerpo. Un idea ta tambe pa kuminsá ku servisio militar obligatorio na Boneiru manera ántes. Esaki por yuda forma e hóbennan ku ta bin na remarke pa por registrá pa servisio militar. Mester skrin e kandidatonan ku ke bira polis mas mihó tambe pa por tin un resultado optimal den formashon i den práktika despues di formashon.
Pueblo ta kansá, fadá i preokupá
Otro problema ku tambe mester di solushon ta e lèkmentu di informashon den i for di Kuerpo Polisial Hulanda Karibense. Ki dia gezaghèber ta laga hasi investigashon? Pueblo ta kansá, fadá i preokupá pa su siguridat. Riba kiko ta warda? Pa ora e kos yega na porta di outoridat mes, pa e ora ei si aktuá ku tur tipo di man duru? Gezaghèber, Ministerio Públiko i Kuerpo Polisial Hulanda Karibense tin un responsabilidat pa nos siguridat na Bonaire. Por fabor asumí e responsabilidat aki i trese pas, trankilidat i siguridat bèk den tur kas na nos isla.