Ta fresco den nos memoria loke algun tempo pasa formador y actual minister Gerlien Croes a bisa tocante personanan cu lo por bin na remarke pa traha den bestuurskantoor y Cocolishi. Nos ta cita esaki textualmente loke e la declara na reportero Bryan Koolman di 24ora pa despues minister Croes no bisa cu nos ta saca su palabranan for di contexto:
‘E formado Croes a confirma cu esaki no lo sigui mesun cos mas. A yega ora cu tin hende na trabou djis t’ey, mester pasa pasado. Croes a confirma cu ya caba a delibera riba e topiconan aki. Lo sali vacatura pa por aplica p’un trabou den Cocolishi. Esaki ta algo nunca bisto den gobierno na Aruba. Na Hulanda e ta normal, cu esunnan cerca di e minister ta ambtenaar. Contrario na Aruba cu bo ta bin cu e gobierno y bay cu e gobierno, ey, ta e politico ta bin y bay pero e ministerio ta keda intacto. AVP-FUTURO ya ta trahando riba un ‘formatieplan’ caminda ta indica tur e funcionnan pa cada ministerio, salario, cuanto por maximo of minimo y tur locual cu tin di haber cu recurso humano.’
Awe despues di mas di 100 dia di gobernacion di e gobierno AVP sin Futuro esaki ta pasa pa un otro engaño, un otro promesa bashi y mas bien un estilo di manipulacion pa bende pueblo un 6 pa un 9. Minister Croes a tuma tur hende haci, e la gaña pueblo pasobra te awe ningun hende por a wak un formatieplan, te awe ningun vacatura a wordo publica, ningun open sollicitatie a tuma lugar sino mas bien awe nombracionan ta yobe, funcionnan nobo ta wordo inventa pagando salarionan di mas di 15.000 heldu pa luna y di e forma aki abusa di placa di pueblo.
Awe pueblo mes ta mira con funcionnan manera diplomatico cultural ta wordo inventa y crea pa Partido AVP pa acomoda hende. Partido Futuro NO ta keda atras y ta inventa e funcion di district advisor. Nos ta mira con fotografonan y ex candidato di Raiz y actual candidato di Futuro ta haya promocion y ta bira beleidsmedewerker. Tur e funcionan aki ta wordo recompensa cu 15.000 heldu pa luna mientras tur dia prijsnan ta subiendo, costo di bida subiendo, 83% di nos poblacion ta indica cu placa no ta yega y placa ta wordo kita for di transporte pa muchanan special.
Loke ta caracterisa e gobierno aki ta un gobierno sin vision, sin liderazgo, sin direccion y un gobierno cu a bin pa abusa di fondonan publico. Ningun promesa a wordo cumpli cune, e situacion na Aruba NO a bira miho manera a ser priminti, costo di bida ta mas halto cu nunca, poder di compra a bay atras y e proyeccionan segun banco central ta hopi pesimista. E gobierno aki a resulta un decepcion total y Partido Futuro a demostra caba cu nan ta carece seriedad, carece profesionalismo y mas bien ta haciendo mescos cu Partido AVP pero obvio pasobra nan ta un ’’ verlengstuk’’ di Partido AVP!