Detenshonnan pa manehá bou di influensia di alkohòl
Den e último dianan a detené tres shofùr pa manehá bou di influensia di alkohòl. Dos di nan a hasi un tèst di supla ku resultado positivo. E di tres shofùr despues di diferente intento no a pasa e tèst di supla i a detené. A hiba tur tres shofùr warda di polis pa un análisis di rosea.
A detené un hòmber di inisial R.A.D. di 54 aña di edat na Kaya Korona. E sospechoso tabata enbolbí den un aksidente. El a haña un prohibishon di manehá pa 4 ora.
E hòmber di inisial S.B. di 23 aña di edat a haña un prohibishon di manehá pa 3 ora. A detené na Kaya Gilberto F. (Betico) Croes despues ku e tabata enbolbí den un aksidente.
A detené un hòmber di inisial F.E.M. di 67 aña di edat na Kaya Hulanda. E sospechoso tabata mustra komportashon di manehá peligroso, loke a kondusí ku un siudadano a mèldu esaki na ‘meldkamer’. Debí na esaki un patruya a par’é pa kòntròl. Apesar di vários intento, e sospechoso no por a hasi e tèst di supla na e sitio. A base di sufisiente prueba pa manehá bou di influensia, a detené e shofùr. A konsekuensia di un análisis di rosea na warda di polis, a
konfiská su reibeweis.
Aksidente entre outo i dòmtrùk
Den oranan di mainta di djamars 26 di ougùstùs, alrededor di 10.50 or, ‘meldkamer’ sentral a risibí notifikashon tokante un aksidente entre un outo i un dòmtrùk na e krusada di Kaminda Yato Bako i Kaya Macario (Cai) Sint Jago. Ambulans a presentá na e sitio pa hasi chekeo médiko ku shofùr di e outo, despues di kua a transport’é pa hòspital pa tratamentu médiko. Konforme e maneho di ‘botsen is blazen’ a hasi un tèst di supla ku ámbos shofùr, ku resultado negativo.
A konfiská skuter hortá.
Den oranan di anochi di djaluna 25 di ougùstùs, un patruya a mira un skuter ku dos okupante; ámbos no tabatin hèlm bistí. E patruya a duna e shofùr òrdu pa para pa un kòntròl, pero e no a duna oido na esaki. Seguidamente e patruya a pèrdè e skuter for di bista. Kòrtiku despues a bolbe topa ku e skuter riba Kaya Amsterdam. Na momentu ku e okupantenan a mira polis, nan no por a sigui kore debí na un seru di tera. Ambos persona a baha for di e skuter i a hui na pia. Despues di investigashon mas aleu a resultá ku ta trata di un skuter hòrtá i a konfiská esaki. No a detené e sospechosonan ainda i ta investigando e kaso.
Kiebro na akohida
Djaluna 25 di ougùstùs a drenta keho di kiebro i destrukshon na un akohida despues di skol na Kaya Nieuw Amsterdam. Deskonosínan a haña akseso na e edifisio i a bai ku un radio. Ta investigando e kaso.
Bo a mira algu sospechoso? Yama 717 8000 òf e liña di tep anónimo 9310.