Riba djaluna 1 di sèptèmber Entidat Públiko Boneiru a selebrá Dia di Prensa ku prensa lokal, periodistanan i profeshonalnan di medionan di komunikashon di Boneiru. Ku e inisiativa akí Entidat Públiko Boneiru a mustra apresio pa e kompromiso di prensa ku durante henter aña ta hunga un ròl krusial den komunikashon ku nos komunidat.
E enkuentro a tuma lugá na Mirage Beach Club i e tabata den e tema “Konstruyendo Lasonan Fuerte ku Prensa”. E anochi tabatin un ambiente kreativo di ‘den konstrukshon’, ku un sena konhunto i weganan di kues ku enfoke riba kolaborashon i kompartimentu di konosementu. Tabatin espasio tambe pa un kòmbersashon habrí tokante kon por sigui fortifiká e kolaborashon entre gobièrnu i prensa.
Entre e presentenan tabatin diputado Anthony Weber, direktor di Maneho i Sosten Cherethy Kirindongo, Sekretario Insular Christopher Frans, hefe interino di departamento di Komunikashon Kenneth Charlemagne, miembronan di e departamento akí, i miembronan di RCN. Ademas, esaki tabata e promé okashon pa prensa topa personalmente ku direktor Kirindongo for di dia ku el a haña su nombramentu.
“Prensa ta indispensabel pa nos komunidat. Nan trabou ta sòru pa habitantenan di Boneiru keda bon informá i enbolbí”, segun Cherethy. “Ku e selebrashon akí nos ke ekspresá nos apresio i na mes momentu fortifiká nos laso ku prensa mas aleu, di manera ku huntu nos ta sigui konstruí un komunidat transparente i konektá.”
A sera e anochi ku un bista positivo padilanti i e deseo konhunto pa den futuro hasi e kolaborashon mas estrecho ainda.
