Durante e reunion publico den Parlamento di Aruba awe mainta, Eduard Pieters miembro di Parlamento pa fraccion di PPA, a manda un mensahe cla y raspa: e bos di pueblo mester ta respeta, nos autonomia mester ta protega y Aruba no por entrega su derecho di maneho financiero den man di Rijkswet HOFA. Pieters a recorda cu dia 30 di januari, fraccion di PPA y MEP a pidi pa tene un reunion publico pa trata netamente e proceso rond di e Rijkswet y e Bestuurlijk Akkoord y awe nos ta mira e resultado.
Confusion y puntamento di dede
Segun Pieters, e debate ta bira un wega di ken tin culpa: “Den e reunionnan aki ta tira lodo riba otro, ta punta dede ken a firma e Bestuurlijk Akkoord, ken a adopta e proceso di e Rijkswet, etc.” P’esey mes Eduard ta pidi pa transparencia total pa pueblo sa ken a tuma cua decision y basa riba kico.
Un mandato sin vision
Pieters a pone e realidad politico na claridad: Partido AVP a bay campaña sin programa, sin meta, sin vision, pero a logra saca 17.872 voto, cual tabata bon pa 6 stoel mas 3 restzetel. Esaki ta un diferencia sumamente chikito di 312 voto compara cu MEP y a haci AVP e partido mas grandi den 2024. “Si PPA-MEP-AVP hunto ta bisa NO na Rijkswet, nos ta representa mas di 50% di voto di e votantenan y 70% di voto di e pueblo cu a uza nan derecho di voto.
E promesanan sin plan real
E fraccion di PPA a critica e gabinete AVP-FUTURO: e Minister di Finansa a pinta un panorama bunita; mas placa, mas poder di compra, un fondo di inversion, pero te awe no tin plan ni ruta pa cumpli cu esaki. En bes di sinta cu e gremionan social, sindical y comercial pa renegosha un acuerdo cu realmente ta protega autonomia di Aruba, nan ta opta pa defende e acuerdo aki, cu fraccion di PPA a rechasa.
Algun pregunta crucial sin contesta satisfactorio
Pieters a presenta algun pregunta esencial y crucial durante e reunion di awe mainta:
1. Basa riba Articulo 40 di Ley di Reino y punto 11 di e Bestuurlijk Akkoord, si Parlamento ta
ratifica HOFA, Hulanda lo refinancia automaticamente nos debenan na interes reduci?
2. Tin otro condicion skirbi of subhetivo mara na e disposicion di Hulanda pa refinanciamento di
e debenan externo?
3. Basa riba Articulo 40 inciso 3 y punto 12 di e acuerdo: kico ta pasa cu e beneficio di interes reduci si fondo di invershon ainda no ta funcionando?
4. Con lo sa si nos ta cumpli cu e 20 criterianan, si ta uza e palabranan superficial, manera “risico’s in beeld brengen”?
5. Con lo opera e Begrotingskamer independiente sin garantia di placa ni personal getrain?
6. Con un Conseho di Minister di Reino por tin poder riba presupuesto di Aruba sin kita bos y autoridad di Parlamento?
7. Basa riba Articulo 38 di HOFA y punto 5 di e Acuerdo: con e derecho di aprobacion previo di Conseho di Minister di Reino ta compatibel cu e autoridad soberano di Parlamento di Aruba pa aproba presupuesto nacional?
Na final, Pieters a recorda e palabranan di nos himno nacional: “Cu Dios por guia y conserva nos
amor pa Aruba su libertad.” El a conclui cu e debate aki no ta solamente riba number of percentahe di interes, sino riba nos alma nacional. E pueblo di Aruba a papia cla: nos no ta firma nos autonomia den un Rijkswet, cu ta menasa nos derecho democratico.