No tin limite ora cu amor, fe y boluntad ta e forsa di mas grandi den bida. Su deseo di bishita nos isla Aruba a bira un bunita realidad na momento cu Make-A-Wish Foundation a haci esaki posibel.
Hunto cu Premier Eman, Minister Cicilia y invitadonan, diabierna anochi durante e actividad di cendemento di luz di pasco na Bestuurskantoor, e hoben turista William Bergen Barlow di Ontario, Canada a efectua e cendemento di luz pa Gabiente AVP-Futuro y asina duna inicio na e temporada di fin di aña.
Su presencia no a keda na esey so, un invitacion cordial a bay na William y henter famia pa asina nan por haya un recorido den Cocolishi y cera conoce cu diferente mandatario, como tambe e trabou cu un gobernacion ta encera.
Durante su recorido den Cocolishi a haya un obsekio di parti Minister Wendrick Cicilia, cual tabata un soldachi cu simbolicamente ta refleha su lucha y determinacion manera un soldaat contra cualkier obstaculo cu el a encontra cu su salud. Tambe a haya oportunidad di conoce varios area di Cocolishi y saluda Minister di Husticia Arthur Dowers.
William su impresion di nos isla ta uno di gran admiracion, e ta haya e isla sumamente bunita. Ademas di Aruba su historia, e ta fascina tambe cu e calides di e isla den Caribe.
E bishita aki tabata su prome biaha na Aruba, y manera hopi cu ta bishita nos isla, e awa cristalino cu ta rondona nos ta algo cu hopi ta keda impresiona cu ne, esaki no ta un excepcion pa William. El a bishita y disfruta di lama caminda e por a drenta awa y landa poco.
E tabata un experiencia unico p’e, caminda ademas di por a cera conoci cu Prome Minister di Aruba, el a forma parti di e acto di cendemento di luz. William a indica: “I Love Aruba”. No obstante su limitacion fisico, su condicion cu a pone cu pa gran parti di tempo e ta hospitalisa, William ta un hoben cu hopi curiosidad pa conoce diferente cultura y experiencia locual cu Aruba a ofrece for di momento cu el a yega.
William ta sumamente gradecido di por a haci e soño aki bira realidad, e tambe a laga un recuerdo atras y asina keda semper den historia. E lo forma parti tambe di e reforestacion di nos isla y lo planta un mata pa asina semper por corda su bishita na Aruba.
Press release: Gobierno di Aruba
