“Porko sushi semper ta buska muraya limpi pa frega su kurpa”
Ku sinsero desepshon mi a tuma nota di e akusashonnan públiko di e señor Thielman i frakshon di MPB relashoná ku posibel kompra di un parsela na Santa Clara. Laga mi ta direkto i hopi kla: Mi ta rechasá tur akusashon ku firmesa. Integridat pa mi no ta un palabra polítiko pa pega riba un poster; e ta e base di ken mi ta i kon mi ta traha.
Distansia for di Promé Dia
Sí, ta bèrdat ku e parsela en kestion tabata di mi defuntu tio, sr. Julian Abraham. Pero presisamente pa motibu di e laso familiar ei, mi a hasi loke tur mandatario íntegro mester hasi: mi a formalmente retirá (verschoon) mi mes for di e proseso di tuma desishon for di promé dia.
Kiko ‘retirá’ (verschoon) ta nifiká den gobernashon? Ta simpel: e ta nifiká ku bo komo mandatario ta retirá bo mes for di tur kòmbersashon, diskushon i desishon final tokante un asuntu kaminda abo tin un interes privá (òf e aparencia di esaki). Ami no a keda pa disidí, no a negoshá ni no a vota riba e kompra aki. Esaki ta e prinsipio ku mi ta mantené haltu.
Tereno ‘Trabou Pisá’ (Zware Bedrijvigheid)
Boneiru tin mester ku urgenensia mas bibienda i infrastruktura pagabel. Pa baha e gastunan ei, nos mester di mas kompetensia den e sektor di konstrukshon i infrastruktura.
Pa logra esaki, tin gran demanda pa tereno ku e destinashon di ‘Trabou Pisá’ (Zware Bedrijvigheid) na Boneiru. Na e momentunan akí, Entidat Públiko Boneiru (OLB) no tin akseso na sufisiente tereno ku e destinashon krusial akí. Ku posibel kompra di tereno stratégiko, gobièrnu ta hanja akseso na mas parsela ku e por otorga den erfpacht na mas kompania den e sektor aki, lokual ta kondusí na produkshon mas haltu, mas kompetensia i un bahada di preisnan. Pues e kompra ta den e interes general di tur siudadano ku kier yega un kas pagabel.
Klaridat i e Pasonan Nesesario
Mi mester konstatá ku loke opositor polítiko ta bisa tokante otro, hopi biaha ta deskribí nan propio manera di hasi, pensa i aktua i nan kier proyektá esaki riba otro. E dicho “Porko sushi semper ta buska muraya limpi pa frega su kurpa” ta lamentablemente na su lugá aki.
Si Konsehal Thielman a sigui ‘Kodiko di Kondukta’ i e Gentle Agreement -e reglanan ku nos tur a bai di akuerdo kuné- e lo a opta pa prome puntra na Gezaghebber den tur trankilidat i konfidensialidat i fásilmente a konvensé su mes di e echo ku mi a retirá mi mes (verschoon) for di e asuntu akí. Pero, e la skohe deliberadamente pa buska pa hasi daño públiko.
Pa yega na klaridat i pa hasi hustisia na mi integridat, mi a pidi e Gezaghebber pa inisiá un investigashon independiente riba e asuntu akí.
Mi ta lamentá e akusashonnan sin fundeshi akí i lo tuma e pasonan nesesario pa protehá mi honor i bon nòmber.
Press release: Diputado Clark Abraham