Aruba ta prepara pa otro momento di orguyo cultural y creativo: diseñador Arubiano di moda Andrew Steba ta invita, pa di dos biaha, pa presenta su obra den e Barranquilla Fashion Week (BFW), cu ta tuma lugar di 19 te 23 di november 2025 den Colombia.
Steba lo presenta 15 piesa di su coleccion “Mondi Mistico” durante e plataforma internacional, y na mesun momento ta preparando pa amplia e coleccion pa su participacion den Aruba Fashion Week 2025 na december proximo, unda e lo presenta 24 piesa.
E invitacion di BFW a bin tras e gran impresion cu Steba a laga na edicion anterior caminda su trabou a haya un aceptacion grandi como diseñador internacional. “Ora cu otro pais ta trata bo cu e nivel ey di admiracion, bo ta ripara cu e esfuerso ta duna su fruto,” Steba a conta, agregando cu e experiencia tabata emocionante y inspirador.
E estilo di Andrew Steba por ta describi como clasico cu un toke moderno, marca pa silueta grandi, elegancia, y un sentido teatral refina. E ta un diseñador cu ta gusta pusha limite den patronchi y forma, mientras ta mantene semper un esencia femenino y sofistica.
Su coleccion nobo ta inspira den naturalesa Arubano, mas specificamente den e especie autoctono di cododo, y den herencia spiritual y cultural di nos isla. Steba a investiga e conexion di e prome Indjannan Arawak cu naturalesa, harmonia y ceremonia, y a uza e simbolismo ey pa interpreta prints, silueta y borda cu piedra.
E coleccion ta consisti di tres parti: e prome ta animal prints, e di dos ta ready-to-wear cu bachi pa hende homber y hende muhe, y e di tres ta e shimisnan di gala cu borda detaya cu simbolismo ceremonial.
Contrario na su participacion anterior, e biaha aki Steba ta traha cu un ekipo creativo na Aruba y Bogota cu ta duna sosten den costura, produccion y coordinacion. E ta resalta cu esey ta permitie eleva e nivel di su obra sin compromete su identidad. Adicionalmente, Steba ta den proceso di rebranding visual.
E ekipo di Andrew Steba Atelier ta expresa su profundo agradecimento na UNOCA (Union di Organisacionnan Cultural Arubano) pa su confianza y apoyo financiero na e vision creativo di Andrew Steba. E apoyo aki ta un muestra di fe den e talento local y den poder di moda como expresion cultural di Aruba.
Por sigui su trabou a traves di Instagram @andrew_steba y na pagina di su atelier Andrew Steba Atelier, unda contenido nobo ta cuminza sali durante y despues di e Barranquilla Fashion Week. Hopi exito!
