Fraccion di MEP a entrega mocion di desconfiansa contra Minister Gerlien Croes

Durante e reunion publico di awe, 17 di december 2025, tratando e Presupuesto 2026, nos
Fraccion a entrega oficialmente un mocion di desconfiansa contra Minister Gerlien Croes. E
mocion ta exigi pa e mandatario pone su cartera disponibel inmediatamente debi na
cuestionnan serio di integridad y falta di transparencia.
E motibo principal pa e mocion aki ta e biahe cu Minister Croes a realisa dia 19 di november
ultimo pa Corsou den un avion priva. Nos Fraccion tin hopi duda rond di e financiamento di e
biahe aki y e conducta di e minister despues di esaki.
Puntonan clave di e mocion:
 Falta di Transparencia: Minister Croes a declara cu e mes a paga pa e biahe, pero te
cu awe el a faya den presenta comprobante di pago, ki dia el a paga, cuanto el a paga
y na ken el a paga.
 Irregularidad den Vuelo: E doño di e avion priva no tin un permiso comercial, locual
ta nifica legalmente e no por a ricibi pago pa e vuelo.
 Violacion di Codigo di Conducta: nos Fraccion ta enfatisa cu un vuelo priva ta wordo
considera un regalo di balor halto. E "Gedragscode voor Ministers (2023)" tin regla
hopi stricto riba aceptacion di regalo pa evita cualkier imprecion cu tin conflicto di
interes.
 Informacion Incorecto: nos Fraccion ta acusa e minister di a duna Parlamento
informacion deliberadamente incorrecto y incompleto, strobando asina e trabou di
control di Staten.
Minister Gerlien, tene honor na bo mes!
Nos Fraccion ta considera cu e minister a faya gravemente den su obligacionnan di
integridad, transparencia y ‘good governance’. E actuacion aki a daña e confiansa den su
persona como mandatario di un forma ireparabel cual a conduci na e mocion di
desconfiansa. Parlamento tin e deber sagrado di controla gobierno y nos no por tolera un
mandatario cu ta gaña y stroba e control democratico aki. E mocion di desconfiansa no ta djis
un reproche, e ta un paso necesario pa proteha e seriedad di nos gobernacion. Ta ora pa
Minister Croes asumi su responsabilidad politico y retira inmediatamente.