E problema di cacho y pushi riba caya ta bira cada dia mas visible na Aruba. Den diferente bario, ciudadano ta reporta grupo di cacho riba caya cu ta crea situacion peligroso pa conductornan, ciclista y personanan cu ta cana of core pa salud.
Accidentenan por sosede facil ora cacho ta cruza caminda inesperadamente. Na otro banda, doñonan di bestia di cria tambe ta sufri daño, cu reportahe di cacho cu ta drenta cura y mata cabrito, galiña y otro animal.
Mas cu e peligro pa comunidad, e situacion aki ta mustra falta maneho estructural. Control di cacho riba caya no ta solamente un asunto di bienestar animal, sino tambe un cuestion di siguridad publico.
Gobierno tin un rol clave den esaki. Esaki ta inclui crea y aplica un plan integral cu sterilisacion, registro obligatorio di mascota, control riba abandono di animal y un sistema efectivo pa recoge cacho y pushi riba caya. Tambe ta importante fortalece control riba aplicacion di ley y aumenta educacion publico riba responsabilidad di doño di animal.
Sin direccion cla, coordinacion entre instancia nan y accion consistente, e problema lo sigui crece. Un maneho serio no solamente ta proteha comunidad, pero tambe ta evita sufrimento innecesario di mes animalnan riba caya. Gobierno no por sigui sinta man crusa y haci nada, mientras e problematica aki ta sigui crece.