Minister di Husticia, Integracion, Transporte Publico y Energia, mr. drs. Arthur Dowers, durante di un conferencia di prensa, a anuncia su maneho nobo relaciona cu e uzo ilegal di vehiculonan electrico manera E-Steps, E-Bikes y E-Scooters riba camindanan publico. Pareu cu e anuncio aki, minister Dowers a indica cu lo duna e companianan cu ta haci negoshi cu e vehiculonan aki, e oportunidad pa kita esakinan for di espacionan publico.
Algun dia despues di e anuncio publico aki, un di e operadonan a bira conoci pa Gobierno, na momento cu nan a entama un caso sumario contra e maneho di Minister Dowers. Despues di casi dos siman, riba diahuebs 29 di april, autoridad a kita tur vehiculo electrico no autorisa cu a haya explicitamente riba tereno publico den area di hotel y e mesun operado, pa medio di su abogado, a pidi huez un “ordemaatregel” pa haya su pertenencianan bek cu autoridad a tuma “in bewaring” e mainta ey.
Prome cu a entama e caso sumario, ningun instancia relevante tabata sa ken ta opera e cantidad di vehiculo electrico riba espacionan publico mirando cu ningun di e vehiculonan aki ta registra, tin seguro of a pasa inspeccion tecnico y sigur no tin permiso pa por haci negoshi cu e vehiculonan aki.
E decision di Minister di Husticia mr. drs. Arthur Dowers pa no sigui tolera e caos cu e minister di husticia anterior a permiti, no ta basa riba sentimentonan emocional sino basa riba leynan concreto y conseho di un comision di siguridad den trafico cu a traha desde aña pasa riba solucionnan practico. E comision di siguridad den trafico ta consisti di expertonan huridico di Ministerio Publico, Departamento di Inspeccion Tecnico (DTI), Departamento di Legislacion y Asuntonan Huridico (DWJZ), Cuerpo Policial y funcionarionan di Ministerio di Husticia.
Cu e decision temporal di huez pa entrega e vehiculonan aki bek na e doño, huez no a duna e doño luz berde pa verhuur esakinan sin mas, mirando cu a enfatisa den e “ordemaatregel” cu autoridad tin e opcion pa atende cu usuarionan di e vehiculonan aki na momento cu nan ta riba camindanan publico, pues a hala e responsabilidad pa e usuario.
No obstante e decision temporal aki, Minister Dowers ta para firme pa su decision pa trece orden bek den trafico y ta warda riba e decision di e “caso sumario” cu lo tuma luga diabierna dia 8 di mei. Hunto cu e expertonan den e comision di siguridad den trafico, ta sigui traha na bienestar di siguridad y orden den trafico.
