Mientrastanto cu den Binnenhof na Den Haag e bishitanan di trabou di Secretario de Estado, Eric van der Burg, ta wordo presenta como un esfuerso pa reforsa e lasonan den Reino, riba e islanan e sintimento ta completamente diferente. Patras di e fachada di un ‘asociacion igualitario’ (partnerschap), e realidad politico na Bonaire y Aruba ta mustra un patronchi preocupante di legislacion unilateral, presion financiero structural y un desprecio sistematico pa e mandato democratico local.
Tanto na Kralendijk como na Oranjestad, e comunidadnan y nan representantenan ta sinti cu e decisionnan crucial ta keda dicta for di un distancia legal di miles de kilometer. Locual mester tabata un Reino basa riba respet mutuo y autonomia, segun e Statuut, cada bes mas ta mustrando cara di un gobernacion caminda Den Haag ta impone su boluntad cu e sacada di placa den man.
Bonaire: E Ilusion di Igualdad y un Entidad Publico, Openbaar Lichaam cu no ta Municipio manera ta wordo propaganda pero un teritorio administra pa Den Haag sin Derecho
E situacion na Bonaire ta sinta riba un herida democratico cu nunca a cura. Na aña 2010, un mayoria aplastante di no menos cu 88% y na 2015 66% di e Bonairianonan a vota contra e status actual di ‘entidad publico’ (openbaar lichaam) durante dos referendum. Apesar di e rechasonan democratico aki, Hulanda a scoge pa pone e uitslagnan un banda y pusha e integracion structural padilanti contra e bos y deseo di e pueblo. E desprecio aki pa e soberania popular ta keda un mancha den e relacion cu Den Haag, Mientras tanto nan ta papia di traha hunto y pa tin igualdad , pero den practica ta diferente.
Boneiro te dia di awe ta luchando y awendia, e critica a alcansa nivel internacional. Organisacion di Nacionnan Uni (VN) a expresa preocupacion severo riba e trato desigual cu e ciudadanonan di Bonaire ta ricibi compara cu e habitantenan di Hulanda Europeo. Sea cu ta trata di e definicion di e minimo social, cuido di salud of infrastructura, e realidad ta cu un ciudadano na Kralendijk no tin e mesun derechonan fundamental cu un ciudadano na Almere of Eindhoven, of den henter Hulanda manera tur Hulandes.
Aki ta lanta e pregunta structural: Kico Bonaire ta realmente pa Hulanda? Den practica, e ministerio na Den Haag ta trata e isla manera un municipio Hulandes ora tin cu impone obligacion, pero ta nenga di duna e derechonan constitucional cu ta bin hunto cu ne. E revision actual di e leynan WolBES y FinBES ta e ehempel di mas recien: e leynan aki ta wordo sinti como un dictat unilateral caminda Tweede Kamer ta dicidi, mientras cu e politiconan y e pueblo local no tabatin un bos real den e decision final.E mes un practica aki ta mustra e mes un bachi cu e ley di Reino HOFA ta bin cu ne pa Aruba.
E contraste aki entre e practica duro di gobernacion y e palabranan bunita di igualdad ta lanta speculacion serio rond di e disculpa nan historico pa e pasado di sclavitud. Hopi riba e isla ta puntra nan mes si e disculpa nan ey tabata sincero, of si nan tabata puramente un teatro politico pa drecha e imagen moral di Hulanda, mientras cu e reflehonan colonial den e structura di gobernacion actual ta keda intacto.
Aruba: E lucha pa Autonomia y e Bypassmento di Parlamento
Mientrastanto, na Aruba e tensionnan constitucional a escala te na un punto di ebulicion rond di e Ley di Reino pa Supervision Financiero (HOfA). E disputa aki ta pone un luz cora structural riba e trias politica di e isla. Mientras cu e poder ehecutivo ,e Gobierno di Aruba forma pa e coalicion AVP-FUTURO a duna su cooperacion tras di porta cera, e poder legislativo di Parlamento di Aruba, te dia di awe reunion no a tuma luga y ser yama pa trata e ley prome cu Gobienro hibe Hulanda. Parlamentarionan ta nenga rotundamente di duna consensus.
E esencia mes di un Ley di Reino (Rijkswet) ta exigi consenso legal entre e paisnan. E HOfA no tin e consenso aki den Parlamento y e ta bay directamente contra e acuerdonan cera den e Interparlementair Koninkrijksoverleg (IPKO). Si Hulanda ta opta pa pusha e ley aki formalmente via Raad van State y Tweede Kamer, sabiendo cu e bos supremo di e pueblo Arubiano a bisa “No”, e credibilidad di e organonan di consulta manera IPKO ta keda reduci na un simple club di papia sin ningun tipo di poder.
Den Haag ta exigi continuamente ‘good governance’ (bon gobernacion) for di e islanan, pero na e mesun momento e ta tolera y probecha cu e gobierno di Aruba ta actua pafo di su propio parlamento pa haci trato, si mira e ultimo movecionnan cu tabatin. Un actuacion asina for di un Prome Minister Hulandes pa cu e Tweede Kamer lo nifica un crisis constitucional inmediato na Hulanda. Pakico locual ta impensabel na Den Haag, si ta permiti na Aruba ora e ta coveniente pa e agenda Hulandes?
E ‘controlestrategie’ cu a wordo uza na Bonaire awor ta bisti na un bachi Arubiano. Tin un misterio grandi rond di e negociacionnan aki, y e speculacion ta coriendo cu e destinacion futuro di e terenonan vital di refineria (Lago/Valero) ta hungando un rol den e presion strategico cu Hulanda ta aplicando. Ora Hulanda ta mara e ayudo financiero y e condicionnan faborabel di refinanciamento na e condicion cu Aruba mester entrega parti di su soberania presupuestario, esaki no ta un yudansa entre socionan, sino un dictat financiero cu ta abusa di e posicion vulnerabel di e isla.
E bypassmento di e democracia parlamentario ta bini dilanti den e hecho cu e ley local correspondiente, e Landsverordening (LWHO), no a wordo aproba ni debati door di Staten di Aruba. E reunion publico riba e topico aki ta wordo evita den forma sospechoso na Oranjestad, apesar di peticionnan y rappels (recordatorionan) manda door di e parlamentarionan desde luna di maart. Con por ta posibel cu e proceso legislativo den Tweede Kamer na Den Haag ta canando full speed, mientras cu localmente e debate democratico no a wordo permiti pa tuma ?
Un Encrusijada Constitucional
E presion continuo for di Den Haag ta alimentando un desconfiansa profundo y un resistencia creciente riba e islanan, destruyendo e fundeshi di confianza mutuo. Un legislacion asina impactante manera e HOfA of e revision di WolBES no por ta efectivo si e ta wordo imponi for di ariba. Incluso den e propio coalicion di gobierno na Aruba e resistencia ta bisto, loke ta habri e pregunta con Hulanda ta pensa di implementa e leynan aki exitosamente si e base di sosten ta desintegrando na tur skina.
E prueba final pa e democracia den Reino ta sinta den un solo pregunta: Si e pueblo y su representantenan legal bisa oficialmente “NO” contra e condicionnan di Den Haag, e gobierno Hulandes ta dispuesto pa respeta e boluntad democratico ey y cambia di rumbo? Of e palabra autonomia dentro di Reino Hulandes ta existi solamente riba papel, basta cu e islanan sigui baha cabes y bisa “Si” na tur locual Den Haag dicta?
Den e caso aki si e ley di HOFA pasa Aruba ta bira mes un cos cu Boneiro , Hulanda lo dicidi y Aruba mester implementa, si Aruba tin idea nan, ta si Hulanda kier e por wordo implementa no si Aruba ta haye bon pa su propio economia. Articulo 38 den e ley di HOFA ta papia tur cos y e exit bepaling cu ta ilustra un salida, pero e realidad e porta di salida ta inalcansabel.