Colegio di supervision financiero (Cft) ta constata riesgonan considerabel pa e finanza publico di Sint Maarten cerca varios empresa estatal. Banda di esaki, e organisacion di implementacion di e fondonan di seguro social (SZV) ta den problema. Si no tuma medidanan, e reservanan lo caba, loke ta bay trece consecuencianan grandi pa finanza publico. Banda di e presupuesto retrasa pa 2026, Sint Maarten ta trahando actualmente riba un presupuesto puntual pa 2027. Ta importante pa e presupuesto aki atende adecuadamente cu e riesgonan pa e pais.
Sint Maarten no tin politica di participacionnan activo ainda, loke a conduci na problemanan cerca entidadnan gubernamental. Entre otro e compania di telecomunicacion TELEM, e proveedor di coriente y awa GEBE y e compania di post PSS ta enfrentando posibilidadnan financiero limita, y nan ta bao di hopi presion. Ta importante pa implementa solucionnan y pa atende cu e problemanan di governance. Un Hunta di Comisario y un Conseho di Administracion completo cu ta funciona adecuadamente ta un condicion pa por implementa cambio eficazmente.
Na mes momento, Gobierno di Sint Maarten mester atende cu e riesgonan agudo pa finanza publico cerca e entidadnan pa medio di un strategia cla. Esaki ta significa cu mester traha acuerdonan cu e entidadnan den crisis tocante di sostenibilidad financiero of solucionnan di mercado. Pensando riba futuro, Cft ta conseha pa implementa un politica di participacionnan eficaz mas pronto posibel, y pa ehecuta esaki cu e capacidad y experticio rekeri, pa asina percura pa e problemanan aki no bolbe ocuri.
Atencion pa un presupuesto puntual
Banda di e asunto menciona aki riba, pa hopi aña caba Sint Maarten ta enfrentando retrasonan considerabel den e proceso presupuestario. E aña aki, atrobe e presupuesto ta demasiado laat. E presupuesto pa 2026 lo no wordo adopta te memey di aña pa mas tempran, loke ta frustra e posibilidadnan pa traha maneho y pa atende cu riesgonan. Den practica, ta pospone plannan y inversionnan repetidamente.
Conseho di Minister di Reino a pidi Sint Maarten pa elabora un plan di mehoracion di e proceso presupuestario. Gobierno a atende cu e peticion aki diligentemente. Sint Maarten a cuminsa elabora e presupuesto pa 2027 na tempo, y a comparti un planificacion extenso cu Cft. Ademas, Gobierno a yega na un acuerdo tocante di e cuadronan di gasto den un fase trempan. Na mes momento, Cft ta constata cu awor tin obstaculonan den e proceso pasobra no tur Ministerio ta entregando informacion na tempo. Cft ta urgi Conseho di Minister den su totalidad pa asumi su responsabilidad. Solamente si tur partido envolvi haci su contribucion, por stipula e presupuesto pa 2027 prome cu e inicio di e aña presupuestario nobo, di acuerdo cu e meta cu a pone.
Pagabilidad di cuido y pensioennan ta den wega
Un di e riesgonan agudo pa e añanan venidero cu mester atende den e presupuesto pa 2027, ta e deficitnan cerca e fondonan di cuido. Anualmente, e fondonan di cuido, bao di maneho di e Organisacion di Implementacion di Seguro Social y Seguro Medico (SZV) ta incuriendo perdidanan di aproximadamente XCG 35 miyon. Te awor, e deficitnan aki – cu entretanto ta ascende te aproximadamente XCG 500 miyon – tawata wordo absorbe pa medio di e reservanan di e sobra fondonan, principalmente e fondo di pensioen AOV. Dentro di algun aña, e reservanan aki lo caba, poniendo e pagabilidad di e cuido y pensioennan di e ciudadanonan di Sint Maarten bao di hopi presion.
Cft a señala e seriedad di e situacion aki varios biaha caba. No por perde mas tempo. Mester implementa e medidanan cu Sint Maarten a identifica. Segun Sint Maarten, e implementacion di un seguro medico general (GHI) lo conduci na un reduccion di e deficitnan anual. Ta esencial pa introduci e legislacion corespondiente entrante e fecha meta mas actual, 1 di januari 2027.
Banda di e GHI, mester implementa otro medidanan tambe cu lo conduci na ingresonan y/of reduccionnan di gasto. Por ehemplo, Sint Maarten tin como meta pa introduci un impuesto di turista entrante 1 di januari 2027, y ta trahando riba reformanan di e sistema tributario y e servicio di impuesto pa asina mehora recaudacion di impuesto y compliance. Asina ta crea posibilidadnan pa e pais tanto pa absorbe e deficitnan den seguridad social como pa por haci otro gastonan prioritario. Den su estado actual, e likides di e pais ta demasiado limita y e riesgonan ta demasiado grandi, tambe considerando e situacion geopolitico actual. Awor ta e momento pa actua.