Cada detenido den Korrectie Instituut Aruba (KIA) ta costa aproximadamente AWG 300 pa dia na e pueblo di Aruba. Segun nos tin no mas cu 300 preso, pues ta representa AWG 90 mil pa dia y AWG 32.85 miyon pa aña. Pero pa parlamentario Eduard Pieters, e pregunta cu pueblo mester haci no ta solamente cuanto placa nos ta gastando. E pregunta ta:
Kico Aruba ta ricibi bek pa e inversion aki? Segun e lider di fraccion di PPA, e contesta ta preocupante.
Un prison cu no ta prepara pa un di dos oportunidad
Durante su disertacion den Parlamento, Pieters a señala un realidad cu, segun e, no por sigui ignora. KIA no por limita su funcion na custodia solamente. Su mision tambe ta rehabilita y prepara e personanan pa bolbe sociedad. Sinembargo, e realidad ta otro. Solamente dos psicologo. Solamente dos trahador social. Espacio limita pa programa di desaroyo. Y hasta e oportunidad pa presenta Landsexamen a wordo elimina. “Con nos por papia di baha recidivism si nos ta kita e instrumentonan cu precisamente por cambia e futuro di un persona?”
Rehabilitacion no ta gasto. Ta inversion den seguridad.
Segun Pieters, cada preso cu sali di KIA sin educacion, sin tratamento y sin preparacion pa reintegra, ta representa un riesgo pa sociedad y un costo cu eventualmente lo bolbe na pueblo. P’esey, segun Pieters, rehabilitacion no mester ta mira como un luho. Ta e inversion di mas inteligente cu un pais por haci, pa reduci recidivismo y aumenta siguridad. “Si nos no cambia bida den KIA, nos no por spera resultado diferente, ora e persona sali pafor.”
Siguridad no ta caba na e porta di KIA
Pieters a conclui cu e berdadero exito di un instituto coreccional no ta midi solamente den con e ta mantene hende paden.
E ta midi den cuanto hende no mester bolbe (recidivismo). “Nos por sigui gasta miyonnan pa mantene un sistema cu solamente ta castiga, of nos por cuminsa inverti den un sistema cu realmente ta cambia bida.”
Pa Eduard Pieters, e pregunta pa Aruba ta simpel: Nos kier un prison cu ta solamente warda e personanan, of nos kier un instituto coreccional cu realmente ta proteha e futuro di nos comunidad?