Na luna di yüni, Tourism Corporation Bonaire (TCB) a duna rekonosementu na ocho bishitante komo embahador di Boneiru. Esaki den kategoria di bròns, oro i platina.
Paul i Deborah Richer ta bishitando Boneiru pa 10 aña konsekutivo. Nan ta forma parti di un grupo di buseo ku anualmente ta bishitá Boneiru. E seremonia di rekonosementu a tuma lugá na Habitat Bonaire, kaminda Claire Thielman-Sealy a hasi entrega di feneta di bròns na nos embahadornan.
Uschi i Frank Frosin di Alemania, a risibí rekonosementu pasó nan tin 12 aña ku nan ta bishitá nos isla. Nan tambe a risibí nan feneta di bròns pa e okashon akí.
Charles i Barbara Gempler di Merka, ta bishitando Boneiru pa 20 aña kaba. P’esei nan a haña feneta di oro, esaki ta kuadra ku e rekonosementu pa e kantidat di aña ku nan ta bishitá Boneiru.
Pareha Gromotka-Pourier di Rincon a sorpresá nan amigunan hulandes Jack i Riet Janssen. E pareha akí a proponé pa Jack i Riet Janssen haña rekonosementu. E pareha hulandes ta bishitando Boneiru pa 31 aña konsekutivo, espesialmente durante temporada di fiesta di San Juan i San Pedro. Nan ta enkantá ku Boneiru su kultura i e tradishonnan di bario di Rincon pa selebrá i mantené kultura boneriano bibu. Na nòmber di TCB Helen Mercera Helen Mercera a hasi entrega di un bunita oloshi ku imágen históriko di Boneiru.
TCB ta felisitá tur nos bishitantenan ku a risibí rekonosementu i ta yama nan danki pa a skohe Boneiru komo nan destinashon pa pasa algun dia inolvidabel.
