Entidad Público di Boneiru ta haci un yamada na habitante y bishitante pa no duna lora salbahe cuminda. E lora, conoci tambe como Amazona barbadensis, ta un especie di lora cu pa miles di aña ta biba na Boneiru. Boneiru ta un di e ultimo lugarnan caminda e especie aki ta biba ainda den naturalesa.
Maske e poblacion di lora a crece e ultimo añanan, e especie ta keda vulnerabel. Duna lora salbahe cuminda por tin consecuencia dañino. Paranan cu hende ta duna cuminda por perde nan miedo di hende. Consecuentemente, nan ta core mas riesgo di haya accidente cu auto, edificio, of animalnan domestico. Tambe lora hoben por bira dependiente di hende, na luga di siña buska cuminda natural riba nan mes.
Ademas, sitionan pa duna cuminda por plama malesa, ya cu hopi para ta bini cerca di otro. Cuminda cu hende ta duna hopi biaha no ta contene e nutrientenan adecua cu lora salbahe tin mester. Segun expertonan, e lora mas saludabel ta un lora salbahe. E animalnan aki a adapta nan mes na naturalesa di Boneiru y e miho manera pa protege nan ta di laga nan na paz.
E lora ta protegi pa legislacion local y internacional. Ta prohibi pa stroba loranan salbahe, duna nan cuminda, captura, cumpra, of bende nan. E lora ta un parti importante di e patrimonio natural y cultural di Boneiru. Tur hende por yuda ora nan disfruta di e paranan liber aki den naturalesa, sin duna nan cuminda of cria nan como animal domestico. Di e manera aki, hunto nos ta garantisa cu loranan di Boneiru por keda bula liber den futuro tambe.