Falta di pordon ta pone hende permanece den nan pasado.
Falta di pordon ta crea amargura den bida di hende.
Falta di pordon ta danja nos relacion cu Dios..
Falta di pordon ta trece hopi desconfiansa.
Falta di pordon ta pone hende odia y tambe bira vengativo.
Falta di pordon ta kibra famia.
Falta di pordon ta stroba oracion.
Falta di pordon ta kita pas y trankilidad di hende.
No tume como un wega of algo pa broma cune. Bisando ami no ta pordona, laga Dios pordona , of ami ta pordona pero mi no ta lubida, ami ta pordona pero mi no kier mira e persona, y asina tin hopi otro palabra cu hende ta usa cu bo ta ripara, cu nan curason no ta bon, y cu amargura a drenta.
Pero locual Dios kier demostra na nos ta cu ora nos pordona , esun cu prome ta keda liber ta nos mes,y ora nos no pordona nos consenshi no ta keda na pas.
Awor bo ta bisa cu ningun hende no ta hanja sa kico tin den bo curason y cu bo ta carga hende den bo curason y tur dia bo ta papia cu nan of biba hunto cu nan, pero bo curason no ta real cu nan.
Awel bo tin cu stop di ganja bo mes, pasobra falta di pordon ta sali na cla con bo ta trata hende, con bo ta papia cu hende, y hasta den bo fisico, pasobra amargura ta wordo mira hasta den cara y tambe den expresion di hende.
Despues bo ta cuminsa aleha, despues bo no por enfrenta, of bo no por sinta den un combersacion, pasobra bo tin algo contra e persona, y cu tempo a pasa y bo no a laga bay.
Falta di pordon ta habri porta grandi pa diabel, pasobra den e buki di Efesionan 4: 26-27 ta para scirbi: Rabia y no haci pica,no laga solo baha riba boso rabia,y no duna diabel oportunidad. Den un palabra bisa, drecha e asunto pordona otro. Especialmente ora ta trata asunto di matrimonio y famia.Pero tambe no lubida cu Dios ta manda nos pordona tur hende y no solamente nos hendenan di cas.
No laga cuestion di placa, ( Mateo 18:21-35) ta pone bo cana cu rabia riba hende, pero pordona y no cana cu odio den bo curason, no desea malo pa hende, ni tampoco paga malo cu malo. Pero pordona pa bo tin pas cu bo mes , pas cu Dios y pas cu bo prohimo.
Den 1 Juan 3:15 ta para scirbi: Ken cu odia su ruman ta un matado,y boso sa cu ningun matado no tin bida eterno ta permanece den dje.
Pablo ta scirbi den 2 Corintionan 2:10-11 bisando; Ma ken cu boso pordona mi tambe ta pordona,pasobra di berdad loke mi a pordona,si mi a pordona algo,mi ta hacie pa boso motibo den presencia di Cristo, pa satanas no cohe bentaha riba nos, pasobra su trikinan no ta desconoci pa nos.
Falta di pordon ta un arma di hopi maldad, husa un hende su pasado contra dje, pa stroba e persona di bay dilanti, ta malicia del diablo,hopi biaha bo ta tende un hende ta bisa un frase delicado cual ta bisa ta” Ta prohibi pa lubida”.
No usa e frase ey den bo hogar, tampoco den bo matrimonio, y den bo famia, pasobra e ta destructivo, pa amor di Dios, no huse mes den ningun situacion e ta kibra bo relacion cu hende.
Corda locual palabra di Dios ta bisa den Efesionan 4:32.
Sinceramente, Pastor Marcel Balootje.