Eduard Pieters ta cuestiona pakico Gobierno a scoge pa fortalece un compania priva en bes di inverti den un institucion di Pais Aruba. No ta midi un gobierno solamente riba e decisionnan cu e ta tuma. Pero ta midie tambe den e decisionnan cu e ta scoge pa no tuma. Esaki tabata e mensahe fuerte cu lider di fraccion di PPA, Eduard Pieters, a hiba den Parlamento durante e Reunion Publico tocante e maneho di fondonan di Aruba Tourism Authority (ATA).
Mas cu cuestiona un contract, Pieters a lansa un pregunta cu, pueblo di Aruba mester haci tambe: Pakico Gobierno a scoge un compania priva, mientras nos propio compania nacional, Serlimar, a keda afor?
Un oportunidad perdi pa fortalece Aruba
Segun Pieters, Serlimar no ta solamente un compania cu ta recoge sushi. Ta un institucion di Pais Aruba cu diariamente ta presta un servicio esencial na comunidad. Cu mas di 161 trahador, un rol principal den e recogemento di desperdicio residencial y un plan strategico pa bira financieramente sostenibel, Serlimar tabata den posicion pa asumi un papel hopi mas grandi den e maneho moderno di desperdicio. “Nos no ta papia di cualkier compania. Nos ta papia di un patrimonio di Pais Aruba.” Pa Pieters, precisamente ora Aruba mester fortalece su propio institucionnan, Gobierno a scoge un caminda diferente.
Gobierno ta bisa un cos, pero ta haci otro
Durante su discurso, Pieters a señala un contradiccion cu, segun e, no por pasa sin mas. Gobierno ta papia constantemente di fortalece nos institucionnan nacional, pero ora tin un oportunidad concreto pa inverti den un compania di pueblo, e beneficio aparentemente ta bay na un compania priva. “Con nos por papia di desaroyo nacional si nos mes no ta confia den nos propio institucionnan?” Segun e parlamentario, e decision aki no solamente ta afecta Serlimar. E ta manda un mensahe peligroso riba con Gobierno ta mira su propio empresa estatal.
Ironia cu pueblo mester recorda
Pieters tambe a recorda un episodio cu, segun dje, ta mustra falta di vision politico. Na 2018, ex minister y actual lider di PPA, Otmar Oduber, a propone pa Aruba inverti den incineradornan moderno pa modernisa e maneho di desperdicio y hacie sostenibel. Na e momento ey, e propuesta a haya critica fuerte y segun Pieters, hasta a oposicion di e tempo ey a boycott esaki.
“Awo, e mesun gobierno ta busca tres incinerador pa trata otro tipo di desperdicio. Esaki ta ironia di bida. Pero mas cu esey, ta prueba cu Aruba a perde añanan di progreso door di e decisionnan politico.” Pa Pieters, pueblo mester wak e diferencia entre critica politico y vision riba largo plazo.
Nos propio institucionnan mester haya e prome oportunidad
Un di e puntanan cu mas preocupacion a causa den e discurso tabata e hecho cu Serlimar actualmente ta paga aproximadamente 6 miyon florin pa aña na e mesun compania priva pa e famoso tipping fee na Ser’i Teishi.
“Si nos propio compania estatal ta generando entrada pa un compania priva, pakico Gobierno ta sigui fortalece e mesun compania cu mas fondo publico, en bes di yuda Serlimar crece?”
Segun Pieters, si e contract aki tabata cu Serlimar, conforme e reglanan di destaho publico, e compania lo por genera entrada adicional, fortalece su posicion financiero, amplia su servicio y avanza cu su propio plan strategico.
E debate ta mas grandi cu un contract
Pa lider di fraccion di PPA, e cuestion aki no ta solamente tocante un contract pa e containernan di sushi. Ta toca un principio fundamental di gobernacion. Ken ta beneficia ora Gobierno gasta placa publico? Con nos ta aplica ley di destaho publico? “Un gobierno cu realmente ta kere den Aruba mester cuminsa pa inverti den Aruba y conforme leynan vigente. Nos no por sigui debilita nos propio institucionnan, mientras otro ta sigui beneficia cu placa di pueblo.”
Pa Eduard Pieters, fortalece Serlimar no ta solamente fortalece un compania. Ta fortalece empleo, conocemento, capacidad y patrimonio nacional y e futuro di Pais Aruba. Y precisamente p’esey, segun PPA, Gobierno mester duna un contesta cla: pakico nos propio Serlimar a keda afor?