Director di Direccion di Naturalesa y Medio Ambiente (DNM), Gisbert Boekhoudt, a participa awe na un reunion cu prome minister Mike Eman y diferente otro instancia envolvi den handhaving pa tene nos isla limpi. E meta ta pa combina limpiesa cu control efectivo, pa lugarnan publico no solamente wordo haci limpi, sino tambe keda limpi.
Gobierno ta organisando un Dia Nacional pa Cuida Aruba, pues un dia unda Aruba henter ta haci limpi tur skina di nos isla. Sinembargo, segun Boekhoudt, haci un luga limpi ta solamente un parti di e solucion. Mester preveni tambe cu hende bolbe tira sushi na e sitio door di benta of laga sushi atras. “Haci limpi ta un cos, pero percura pa e keda limpi durante un periodo duradero ta parti di handhaving,” Boekhoudt a splica. Durante e reunion, DNM, Bureau City Inspector (BCI), Korps Politie Aruba (KPA) y Ministerio Publico (OM) a delibera tocante e posibilidadnan pa fortalece supervision y aplicacion di ley. E instancianan a analisa con nan por traha hunto y con cada servicio por contribui for di su propio responsabilidad y experiencia. Boekhoudt a indica cu ya tin reglanan pa combati contaminacion y tiramento ilegal di sushi. E Algemene Politieverordening (APV), por ehempel, tin articulonan cu ta stipula unda por y unda no por tira sushi. Ademas, tin reglanan pa establecimiento y companianan cu ta procesa desperdicio.
E tarea di DNM ta, entre otro, studia e articulonan relevante y determina con e control por wordo structura di e miho manera. Afdeling Inspectie di DNM y BCI lo ricibi sosten di KPA. Polis tin mas experiencia cu supervision, preparacion di rapport y traha di proces-verbaal. “Un lo yuda otro pa percura cu e proces-verbaal ta bon argumenta, asina cu Ministerio Publico por sigui cu e proceso,” e director a bisa. Durante e combersacion tambe a wordo papia di e multanan relaciona cu violacion di e reglanan.
E director di DNM a sali optimista for di e reunion. Segun dje, tin bon boluntad entre tur e stakeholders participante. Tambe el a destaca cu prome minister Eman tin un vision cla tocante unda Gobierno kier bay, kico e kier logra y cua aporte cada servicio mester duna.E intencion ta pa crea un combinacion efectivo entre limpiesa, prevencion y handhaving. “Haci limpi ta un cos, pero mantene limpi ta e combinacion cu nos ta buscando,” Boekhoudt a conclui.
