Aruba Ports Authority (APA) a uni su forsa cu Gobierno di Aruba pa sostene Dia pa Cuida Aruba, cu lo tuma luga diasabra, 25 di juli 2026. Durante un momento cu prensa na Harbour Arena, Prome Minister mr. Mike Eman, Minister di Turismo, Transporte y Labor mr. Wendrick Cicilia y CEO di APA, Marc Figaroa, a presenta e participacion di APA den e campaña nacional di limpiesa.
Como parti di e iniciativa, lo instala ocho baki na Harbour Arena pa duna habitantenan di Playa y e barionan den cercania oportunidad di deshaci di desperdicio. E localidad aki ta forma parti di un total di 26 sitio rond Aruba caminda lo coloca baki y ofrece sosten na e comunidad durante e dia di limpiesa.
Prome Minister Mike Eman a enfatisa cu Dia pa Cuida Aruba ta basa riba colaboracion entre Gobierno, companianan estatal, sector priva, varios fundacion, asociacion, centro di bario y e boluntarionan. E meta no ta solamente pa limpia Aruba durante un dia, sino tambe pa stimula un cambio di mentalidad y fortalece e responsabilidad comparti pa mantene nos isla limpi.
Minister Wendrick Cicilia a resalta cu limpiesa di Aruba ta directamente relaciona cu calidad di bida di nos comunidad y cu calidad di nos producto turistico. Aruba ta conoci internacionalmente como un destino limpi, agradabel y bon cuida. Espacionan publico y infrastructura limpi ta importante tanto pa nos propio habitantenan como pa e bishitantenan cu ta disfruta di nos isla. Segun Minister Cicilia, e campaña ta brinda oportunidad pa recupera e balornan cu semper a caracterisa Aruba: amor pa pais, boluntariado, responsabilidad y colaboracion. Un Aruba limpi ta contribui na un ambiente harmonioso y na un destino mas atractivo pa turista pero tambe local.
Marc Figaroa, a resalta e participacion di Aruba Ports Authority cu ta mustra e sosten amplio cu Dia pa Cuida Aruba ta ricibi. APA lo facilita e ocho baki na Harbour Arena y lo contribui cu coordinacion y sosten logistico pa percura pa e actividad cana bon.
Gobierno di Aruba y APA ta invita tur ciudadano, empresa, fundacion, asociacion y grupo di voluntario pa forma parti di e accion nacional dia 25 di juli. Un Aruba dushi pa biba y dushi pa bishita ta responsabilidad di nos tur.
