Nos ta di acuerdo cu Aimed 100% i e tin razon di a lanta su bos. Nos ta duna nos sosten completo na e posicion cu el a expresa durante e programa brunch di radio dia 19 di augustus 2026, tocante e cuentanan di coriente insoportabel cu pueblo di Boneiru ta enfrenta.
Nos politiconan mester worde teni responsabel. E subida continuo di e gastonan di electricidad a yega na un punto caminda hopi hende trahado simplemente no por sobrebibi mas. Hende ta traha tur dia, paga huur, cumpra cuminda cu ta bira cada biaha mas caro, cuida nan yuinan i famianan di edad avansa, i despues nan ta ricibi cuentanan di electricidad cu ta come parti considerable di nan entrada.
Esaki no ta trata simplemente di un cuenta di coriente mas. Ta trata di si famianan trahado ainda por permiti nan mes di biba na Boneiru.
Boneiru tin nuebe miembro di Conseho Insular i tres diputado cu mester representa interesnan i necesidadnan basico di pueblo. Nan mester worde teni politicamente responsabel pa loke nan ta haci — of no ta haci — pa atende cu e crisis aki.
Unda e accion urgente ta? Acceso na energia adecua i pagabel ta worde reconoce como esencial pa realisacion di derechonan humano existente i pa mantene un nivel di bida digno. Electricidad no ta un luho; e ta un necesidad basico di bida moderno. Famianan ta dependé di dje pa refrigeracion, cushina, luz, ventilacion, airco, educacion, salud, comunicacion i funcionamentu diario di nan cas. Sin embargo, habitantenan comun di Boneiru ta enfrenta cada biaha mas cuentanan di electricidad di WEB cu nan simplemente no por paga, poniendo ainda mas presion riba famianan cu ya ta luchando cu e costo halto di bida.
Manera Aimed correctamente a lansa e pregunta na e politiconan durante e programa di brunch: “Politiconan ta warda pa hunga politica cu necesidad di pueblo? Awor eleccion ta na caminda, ta bai usa esaki pa campaña pa eleccion?”
E sufrimentu i dificultad di pueblo nunca mester bira un instrumento pa campaña electoral. Politiconan no mester warda te ora eleccion ta cerca pa di repente cuminsa papia tocante problemanan cu famianan ta lucha cune luna tras luna.
E nuebe miembronan di Conseho Insular i tres diputadonan mester contesta pueblo directamente: Dicon a permiti e situacion aki yega na un punto asina critico solamente algun luna prome cu eleccion?