Enfoca riba mehora servicio y conecta buscado di trabou cu empresa
Minister di Husticia Arthur Dowers a reuni na Bestuurskantoor cu DIMAS, representa pa directora Kathleen Paskel y consehero strategico Gregory Hoogenbergen, pa ricibi informacion tocante diferente desaroyo cu ta andando dentro di e organisacion.
Durante e prome parti di e reunion, DIMAS a presenta su Customer Care Project, un proyecto enfoca riba mehoracion di servicio. Directiva a duna un splicacion di e plan strategico, incluyendo e metanan, trabounan programa, planificacion y costonan relaciona cu su ehecucion. E presentacion tambe a brinda espacio pa Minister Dowers haci pregunta y profundisa den e siguiente pasonan pa implementacion di e proyecto.
Den e segunda parti di e encuentro, DIMAS y Organisacion Internacional pa Migracion (IOM) a presenta hunto un aplicacion nobo desaroya den cuadro di Hunta pa Progreso – Spoor 4.
E aplicacion ta crea e posibilidad pa conecta participantenan di e programa cu empresanan cu ta buscando personal. Ora tin un combinacion adecuado entre un participante y un empresa, por cambia e garante di e participante pa e empresa concerni. Durante e reunion a demonstra cu un ehempel practico con e sistema ta funciona y con e ta diseña pa ta simpel y accesibel den su uzo.
Minister Dowers a reacciona positivamente riba e posibilidadnan cu e aplicacion nobo ta ofrece y a expresa su aprecio pa e iniciativa y e cooperacion cu a haci su desaroyo posibel.
Despues cu e actual trayecto di Hunta pa Progreso – Spoor 4 finalisa, lo evalua si e aplicacion por haya un uzo mas amplio. Entre e posibilidadnan menciona ta personanan cu ja caba tin un permiso y ta buscando otro trabou, como tambe buscadonan di trabou local.
Den futuro, esaki por permiti cu e aplicacion desaroya den un plataforma mas amplio pa conecta buscadonan di trabou cu empleadornan na Aruba, facilitando e proceso pa ambas parti.
E reunion a brinda Minister Dowers un bista mas amplio riba e proyectonan cu DIMAS ta desaroyando actualmente, tanto pa fortalece servicio na cliente como pa haci uzo di solucionnan moderno cu por contribui na un servicio mas accesibel y eficiente.
