Minister di Turismo, Transporte y Labor, mr. Wendrick Cicilia, hunto cu Aruba Tourism Authority (A.T.A.), a presenta oficialmente e renobacion di Facility Center na Rodgers Beach. E proyecto ta forma parti di e esfuersonan pa conserva y revitalisa e facilidadnan publico cu tin tanto balor pa comunidad local.
Facility Center na Rodgers Beach tin un balor sentimental y ta trece hopi recuerdo bunita pa diferente generacion Rubiano, particularmente pa comunidad di San Nicolas. Sinembargo, mientras tempo ta pasa e edificio a deteriora y tabatin necesidad di renobacion y mantencion.
Awo cu e trabounan finalisa, e facilidad a haya un imagen completamente refresca y ta cla pa comunidad local bolbe haci uzo y disfruta di dje. Como parti di e proyecto, tanto e pier como e deck na Rodgers Beach tambe a ricibi e mantencion necesario, contribuyendo na un ambiente mas agradabel y sigur pa tur usuario.
Minister Cicilia a expresa su gratitud na A.T.A. p’e bon colaboracion y compromiso pa sigui realisa proyectonan cu tin un impacto directo riba comunidad.
“E luga aki tin un significado special pa hopi hende. E ta representa recuerdo, encuentro y momentonan comparti cu famia y amigonan. P’esey, ta importante pa nos no solamente crea proyecto nobo, pero tambe conserva, renoba y duna continuidad na loke nos tin caba,” Minister Cicilia a expresa.
Minister Cicilia a aplaudi tur e personanan y instancianan envolvi cu, danki na nan trabou y dedicacion, a contribui pa haci e renobacion aki un realidad. El a enfatisa cu continuidad ta esencial pa garantisa cu inversionnan haci den facilidadnan publico por sigui beneficia comunidad pa hopi aña.
Minister Cicilia tambe a expresa su aprecio pa presencia di Hilario Doncker, kende semper ta pendiente di e proyectonan y desaroyonan cu ta tumando luga na San Nicolas. Su compromiso y involucracion continuo cu comunidad ta algo cu ta di aprecia.
Segun Minister Cicilia, turismo ta un responsabilidad comparti y su beneficionan mester por wordo sinti den henter comunidad, entre otro dor di inversion den espacionan publico cu tanto localnan como bishitantenan por disfruta.
“Nos mester sigui inverti den nos facilidadnan publico, cuida loke nos tin y garantisa continuidad den e proyectonan cu ta beneficia nos pueblo. Na momento cu gobierno, A.T.A. y comunidad traha hunto, nos por crea un Aruba mas bunita y duradero pa nos tur,” Minister Cicilia a finalisa bisando.
