Agrupacion Zjeitu ta rindi homenahe y demostra hermandad cultural
Cu hopi orguyo agrupacion Zjeitu ta lansa su prome ‘live session’, presentando e obra ‘Zjeitu Den Bo Cura’, den estrecho colaboracion cu Aruba Tourism Authority (ATA). Graba na luna di maart ultimo den curason di Savaneta, e produccion a trese un elenco di musico y artista hunto pa demostra e hermandad cultural entre Aruba, Bonaire y Curaçao.
‘Zjeitu Den Bo Cura’ ta un mix di canticanan original di Zjeitu y canticanan cultural di Aruba y ta conta cu composicion di Cesar ‘C-Zar’ Olarte, Bernadina Growell, Etty Toppenberg, Don Ramon Krozendijk, Chendell Beaumont, Edson ‘Chon’ Frans y Dwight Leoneta.
E voz iconico di Cesar Olarte ta habri e live session cu interpretacion di su cantica ‘Aruba ta Bendiciona’, cual el a competi cu ne den e Festival di Himno y Bandera.
Cantantenan di Zjeitu Jetzi Martinez, Kito Tey, François y Rocco Franken a keda compaña pa artistanan invita Edson ‘Chon’ Frans y Rayshantaly Coffie di Bonaire, Tyeisha Bernabela di Curaçao y manera ya menciona, Cesar ‘C-Zar’ Olarte di Aruba.
Hunto cu e musiconan cu a aporta na e forsa musical di Zjeitu, nan ta trese un ora largo di piesanan cu ta rindi homenahe na e cultura Arubano, reforsa pa e lasonan musical di Bonaire y Curaçao.
Un proyecto pa conserva y revitalisa nos herencia musical
Mas cu solamente un produccion musical, ‘Zjeitu Den Bo Cura’ tin como meta pa celebra, conserva y revitalisa e herencia musical tradicional di Aruba. Pa medio di un medley cultural, Zjeitu ta trece bek na bida canticanan y stilonan musical cu a forma parti di nos identidad, pero cu a pesar di tempo a bira menos presente den presentacionnan publico.
E repertorio ta combina canticanan tradicional y tipico Arubano cu areglonan musical nobo inspira di e raisnan di nos musica y hermana isla. Di e forma aki, e proyecto ta duna un bida na nos herencia musical, presentando esaki den un formato moderno y atractivo, pero semper cu respet pa su autenticidad y identidad cultural.
Como parti di e iniciativa, diferente cantica selecta a ser graba y edita profesionalmente, creando contenido pa comparti via plataforma digital y, na mes momento, conserva pa generacionnan futuro.
E colaboracion aki ta ilustra con turismo y cultura por fortalece otro: creando espacio pa nos artistanan y nos herencia cultural, mientras nos ta comparti cu mundo un parti autentico di e historia y alma di Aruba y nos hermandad.
‘Zjeitu Den Bo Cura’ ta un proyecto di Ambiensis Entertainment y Elite Productions cu gran aporte di Aruba Tourism Authority. E produccion audio-visual ta crea pa Rec Light Productions, mientras cu mixing y audio tabata na encargo di Dwight Leoneta (DL Music Lab).
Por gosa di e produccion via e YouTube channel di Zjeitu i tambe retnan sosial.