Aki 1 aña lo bay evalua atrobe
Famia a reclama cu asesino di Raul Croes mester keda preso
Awe mainta Hof di Corte Superior a bolbe pospone e tratamento di e peticion pa libertad condicional pa Cornelio Antonio Hermanus (67), condena na bida largo pa a mata Raul Croes den Dakota.
Por a compronde cu famia di Raul Croes a reclama den Corte pakico ta duna castigo bida largo. Nan no kier pa Hermanus sali liber. Procurador General a pidi pa pospone e caso pasobra ainda falta mas investigacion. Hof a pospone e caso pa 1 aña.
Ta asina cu 9 Februari 2026 a cuminsa tratamento di e caso y Hof a pospone. Awe Hof a bolbe pospone pasobra ainda no tin nada completamente cla.
Den sala di Corte tabatin miembronan di e comision cu ta evalua e peticion pa libertad condicional. Tambe tabata presente Psycologo Boekhoudt, kende ta asisti e comision. Por a mira un funciona halto di Polis presente cu tambe ta envolvi den e proceso.
E famia di e victima Raul Croes, tambe tabata presente. E mama, e tata, e rumannan y e yiu muher di e victima. Ta asina cu e ruman muher, Gisela Croes a pidi pa e hiba palabra y el a wordo scucha pa Hof.
PG A PIDI PA POSPONE TRATAMENTO
Hof a mustra cu na Augustus 2026, Procurador General (PG) a manda carta pa Hof na Curacao. PG a bisa Hof cu un cantidad di trabao a wordo haci pa e comision consisti di hende di KIA, Reclasering y di Gobierno y fundacion Hunto. Ta asina cu tin risico di laga Hermanus haya libertad condicional. Tin hasta di Polis cu ta trahando e plan di seguridad. Ta asina cu Hermanus a pasa dia na Stichting Eliezer Detox & Rehab. PG a mustra cu no tin ainda un lugar pa Hermanus pasa anochi. PG ta haya cu mihor pospone e caso atrobe pa un periodo di 6 luna pa mira con tur cos ta desaroya.
ABOGADO KIER PA LIBERTAD CONDICIONAL
Abogado mr. Croes a bisa cu Hermanus a pasa en toal 44 aña di su bida den prison pa e casonan di asesinato cu el a haci. E abogado a bisa cu e luna aki, Hermanus ta cumpli 68 aña. E abogado a bisa Hof cu Hermanus a bay keda na Stichting Eliezer pero no tin lugar pa e keda anochi. Mr. Croes a sigui bisa cu 20 aña pasa, Hermanus a mata Raul Croes y Hermanus ta lamenta esaki. Segun e abogado, Hermanus a manda carta pa famia di e victima. E ta haya cu mester pone condicionnan pa Hermanus bay cu libertad condicional. El a bisa cu Hermanus ta un hende malo y e no kier mas ta sera den KIA. E abogado ta kere cu e chens cu Hermanus ta bolbe haci algo similar ta hopi chikito.
ABOGADO TA CONTRA IDEA DI PG
Hof a mustra cu for di documentonan cu a ricibi ta mustra cu ta trahando riba un schedule pa poco poco Hermanus reintegra den comunidad. Hof a puntra abogado kico e ta pensa di e proposicion di PG. Abogado mr. Croes a bisa Hof cu e no ta comparti punto di bista di PG.
NO TIN PLAN CONCRETO
HOF a papia cu director di Stichting Eliezer, kende a splica cu nan ta bezig cu un otro localidad na Jan Flemming y un otro localidad mas. E director a splica cu ta trahando cu Respaldo tambe. El a splica cu e fundacion ta yuda hendenan cu tin problema entre otro adiccion. E director a bisa Hof cu e ta dispuesto pa atende cu Hermanus cu ta algo nobo pa Aruba. El a bisa cu e personal lo mester haci training pa atende cu Hermanus. E ta calcula cu dentro di 6 luna lo por cuminsa. El a bisa cu tres biaha Hermanus a bay pasa dia na e fundacion. E director a splica cu nan tin programa caminda ta traha cu bestia y matanan. El a bisa cu e hendenan den fundacion conoce Hermanus. Segun e director, e hendenan a keda asombra di mira Hermanus. Nan a kere cu el a muri. Nan conoce y Hermanus conoce nan.
Hof a remarca cu si tin un plan B si cos no resulta manera a planea. E director a bisa cu esey ta un bon pregunta. El a bisa cu no. Hof a puntra e president di e comision cu ta evalua esnan condena na bida largo, señora Tromp, si tin un plan alternativo. El a bisa cu ainda no. El a bisa cu ta trahando plannan pa estadia durante dia na e fundacion. No por sigura un lugar di keda anochi. Ta buscando un lugar. Tin dos posibilidad caminda Hermanus por keda anochi y ta studiando esakinan. El a bisa cu mester bay mira e localidad y percura pa tin e seguridad. Hof a puntra cu si tin plan di tratamento y si ta asina si a papia esaki cu Hermanus. Señora Tromp a bisa cu actual Hermanus ta hayando tratamento na KIA y tin asistencia di psycologo Boekhoudt. Hof a puntra si tin planea pa Hermanus traha, cual ta algo hopi esencial. E president a mustra cu Hermanus ta malo, diabetico, problema cu rudia y bista. E no ta mira Hermanus lo por haci trabao.
FAMIA A RECLAMA
Gisela Croes (54), ruman di e victima a hiba palabra. E ruman, tur emociona a bisa Hof cu el a mira su ruman homber benta abao morto. El a bisa cu e no ta mira nada a cambia den Hermanus. El a bisa cu famia ta kere cu castigo bida largo ta bida largo. El a mustra cu yiu muher di Raul Croes ta den sala presente cu mester a lanta sin su tata. Gisela a mustra cu Hermanus a mata 2 hende. El a remarca cu si ta asina ta duna castigo, kita bida largo anto! El a bisa cu awor por scucha cu ta buscando libertad condicional, lugar di keda y lugar pa traha. Gisela a remarca cu abogado ta bisa cu Hermanus ta lamenta. Den 20 aña cu a pasa ningun famia a haya carta di lamenta!
El a sigui bisa cu nan ta bisa cu Hermanus tin malesa. Malesa cu tur hende tin. El a bisa cu e mes tin cu sigui tratamento pa bida largo. E ruman muher a reclama, ki garantia tin cu Hermanus no lo bay mata hende atrobe. El a expresa cu famia kier pa Hermanus keda sera. E no merece di bay liber.
Ruman homber di victima Raul Croes a reclama e comision cu ta bisa cu Hermanus no por traha.
Hof a bisa Gisela cu esaki ta un punto hopi delicado. Ta pesey tin e procedura aki. No por bisa cu Hermanus ta bay liber. Mester bay tene cuenta cu tur puntonan treci dilanti den Corte y despues Hof lo bay tuma un decision. Hof a aprecia cu Gisela a hiba palabra.
HOF A HALA ATENCION DI HERMANUS
Hof a puntra Hermanus tocante e programanan cu a wordo papia den Corte. Si e ta conoci cu esakinan y kico e ta pensa. Hermanus a bisa cu loke el a scucha ta nobo p’e pero e ta dispuesto pa sigui tratamento. Hof a bisa cu Hermanus a scucha kico famia di Raul Croes cu el a mata ta sinti di e situacion aki. Hof a remarca cu famia a reclama cu nunca Hermanus a pidi disculpa na e famia. Segun Hermanus, e mesun carta cu el a presenta na Hof pidiendo disculpa, el a manda pa e famia pero e famia no kier accept’e. Hof a hala atencion di Hermanus cu e tin e responsabilidad y mester busca manera pa papia cu e famia. Ta keda na Hermanus pa sigui persisti riba esaki. No ta asina cu si famia bisa cu e no ta ricibi e carta, e ta caba eynan. Hermanus a remarca cu e ta sera den KIA. Hof a remarca cu e ta informa Hermanus di esaki.
HERMANUS A PIDI FAMIA PORDON
Hof a puntra Hermanus kico e ta pensa di loke e ruman muher a bisa cu e ta sinti mesun cos cu 20 aña pasa. Hermanus a bisa cu e ta compronde e ruman muher pero loke e no ta compronde ta, pakico e no ta haya un chens. Hof a bisa cu Hof mester tene debido cuenta cu pensamento di famia di e victima, con e programa ta bayendo y si e ta traha pa Hermanus. Ta Hermanus ta responsabel pa esaki. Hermanus a bisa cu e ta compronde cu ta un ruman y famia di nan y ta duele hopi. El a bisa cu e no por hala e tempo bek. El a pidi e famia pordon’e pa loke a pasa. No tabata su intension. El a bisa cu e no por drumi anochi. Si e bay drumi, e ta blo pensa riba e caso. E kier sali pa tuma aire liber, mira strea.
POSPONE CASO ATROBE
Hof a pospone e caso un rato pa bay evalua. Despues di un rato Hof a bolbe y Hof a bisa cu e no ta cla pa tuma un decision. Hof ta sigui e proposicion di PG y ta rechaza peticion di abogado. Hof a bisa cu e ta pospone e caso pa 1 aña. Hof kier despues di 6 luna haya evaluacion di e comision encarga cu castigo di bida largo. Hof a instrui PG y abogado pa 1 Maart 2027 haya informacion. Hof a mustra cu si e raport di 1 Maart di PG ta motibo pa un evaluacion mas tempran, e ora ey Hof lo fiha un fecha pa trata e caso mas tempran.