Durante su reunion preparatorio di djabièrnè 28 di ougùstùs, Konseho Sosial-Ekonómiko (SER) a risibí un splikashon riba e proyekto di ordenansa nashonal pa revisá e preskripshonnan di destinashon pa e área di Koraal Tabak. E splikashon a ser duna pa ekspertonan gubernamental ku a ser designá pa minister di Tráfiko, Transporte i Planifikashon Urbano (VVRP )Sr. Charles Cooper.
E proyekto ta kontené un revisihon parsial di e Eilandelijk Ontwikkelingsplan (EOP) pa un área di aproximadamente 218 hektar na Koraal Tabak. E intenshon ta pa kambia parsialmente e destinashon aktual ‘Open land’ den, entre otro, ‘Stedelijk woongebied’, ‘Toeristisch gebied’, ‘Parkgebied’ i ‘Hoofdwegen’. Di e forma ei ta krea un kuadro planológiko pa desaroyo di e área. E nota di splikashon ku ta akompañá e proyekto dje ordenansa ta kontemplá un desaroyo den fase ku alrededor di 2.800 bibienda, 500 unidat turístiko i diferente fasilidat sosial, rekreativo i komersial.
E interkambio a duna SER oportunidat pa hasi pregunta adishonal tokante, entre otro, e nesesidat di bibienda, e efektonan sosio-ekonómiko, e gastunan públiko, infrastruktura, protekshon di naturalesa i paisahe, i e posibilidat pa ehekutá e plan. A base di e splikashon risibí i e dosier disponibel, SER ta sigui ku preparashon di su konseho sosio-ekonómiko. E evaluashon final di SER lo keda fihá den e konseho ei.