E celebracion di e ‘Open Dag’ di Brandweer Aruba no solamente a trece alegria pa e miles di bishitantenan cu a drenta Post Tanki Leendert, sino cu el a sirbi tambe como un momento di reflexion profundo pa e personal cu awe ta bisti e uniforme di bombero.
Pa hopi di e bomberonan activo, e Open Dag ta precies e spark cu a cende nan pasion pa e profesion aki. Recordando su propio infancia, Fransis Toussaint a comparti un di su memorianan mas bunita cu su te ainda ta keda fresco den su memoria:
“Mi ta corda tempo mi tabata chikito, dos of tres biaha mi mama cu mi tata a trecmi na e evento aki di Open Dag. Awe, despues di 13 pa 16 aña, mi soño a bira realidad. Si nos por haci un mucha awe su soño bira realidad, p’esey nos ta haci e cos aki pa e muchanan.”
Programa di Actividadnan pa e Siman di Brandweer
E Open Dag a marca e prome gran evento di e siman festivo, cu a cuminsa desde cuminsamento di e siman y cu lo continua cu un programa intensivo pa e personal y nan familiarnan:
- Diamars (Team Building): Lo tene un anochi di bowling di 7:30 PM pa 10:00 PM. E actividad aki ta diseña pa fortalece e lasonan di trabou, invitando e coleganan di Ambulans pa comparti e ambiente di trabou.
- Diabierna (Softball na Kudawecha): Lo tuma luga e ultimo encuentro deportivo di e siman, e torneo di softball na tereno di Kudawecha, di 7:00 PM pa 10:00 PM.
E culminacion di e festividadnan lo tuma luga riba e fechanan principal di e departamento:
- Dia 9 di Oktober (Dia Oficial di Bombero): Lo tene un ceremonia oficial cu bendicion di pastor na Post Tanki Leendert (Tango). A haci un invitacion special na tur colega activo, ex-coleganan y pensionadonan pa presencia e momento di gradicimento y honor aki.
- Dia 10 di Oktober (Family Day): E celebracion lo conclui na Balashi Garden cu un ‘Family Day’ pa e personal y nan famianan, un anochi cu musica en bibo y entretenimento den un seno strictly familiar pa e gran famia di Brandweer Aruba.