Cantante Eltienne Yarzagaray y su banda United Melodies,
hunto cu Ishon Boekhoudt y Gabriel Prato, a trece un mensahe poderoso di fe y
recuperacion durante Anochi di Union, organisa pa Stichting Hunto dia 30 di
september 2026 na Centro Colorado. E encuentro a uni musica, alabansa y
experiencianan personal hunto, pa demostra cu un bida nobo ta posibel despues di
adiccion.
Eltienne Yarzagaray y United Melodies a duna e anochi su expresion musical, cu
canticanan di fe y speransa cu a invita esun nan presente pa reflexiona. Nan
contribucion a complementa e testimonionan, creando espacio pa scucha, comparti y
conecta cu otro.
Ishon Boekhoudt y Gabriel Prato a comparti nan experiencia cu adiccion, nan caminda
di recuperacion y e rol cu fe a hunga den e cambio di nan bida. Nan testimonionan a
trece e tema cerca di esnan presente: tras di cada lucha cu adiccion tin un persona, un
storia y un futuro cu por wordo reconstrui.
Nan a conta con nan fe a yuda nan haya forsa y direccion pa laga e bida di adiccion
atras y sigui riba e caminda di recuperacion. Awe, compartiendo nan storia, nan ta bira
un ehempel pa otro persona cu ta enfrenta un lucha similar. Nan mensahe ta uno di
speransa, pero tambe di curashi: papia abiertamente di un pasado dificil por yuda un
otro persona, pa mira cu e cambio den su bida ta posibel.
E encuentro a duna espacio na storianan cu hopi biaha ta keda tras di silencio y stigma.
Ora bo scucha e storia di Ishon y Gabriel, e ta pone enfasis riba e persona y su
capacidad pa cambia, crece y contribui na bida di otro.
Pa Stichting Hunto, Anochi di Union ta un oportunidad pa fortifica conexion y
comprension rond di recuperacion. Fe por ta un fuente importante di forsa personal;
cuido profesional, apoyo di famia y comunidad, y sigui e trayecto na Stichting Hunto, tur
hunto ta forma parti di e proceso pa personan den recuperacion.
Stichting Hunto ta gradeci Eltienne Yarzagaray y United Melodies pa nan musica y
dedicacion, y Ishon Boekhoudt y Gabriel Prato pa nan curashi pa a comparti nan
experiencia. Danki tambe na tur esnan presente cu a duna nan tempo pa scucha y
compaña nos.
E anochi a laga un mensahe cla: un pasado di adiccion no mester cera e porta pa
un futuro cu speransa.
Fe, musica y testimonionan di recuperacion ta marca Anochi di Union na Centro Colorado
