Haaf di Boneiro a tene su ehensicio anual di siguridad huntu cu Carnival Cruise Line, den cuadro di e Codigo Internacional di Siguridad di Barco y Facilidad di Haaf (International Ship and Port Facility Security Code – ISPS) y e procedimiento di siguridad di nos isla. E ehensicio a tuma luga den forma di un ehensicio conhunto estilo ‘tabletop’, cu a enbolbi representantenan na bordo di Carnival Horizon, autoridadnan relevante na Boneiro y e Fleet Operations Center na Miami. Meta di e ehensicio tabata pa test con nos haaf, e barco, autoridadnan local y servicionan di auxilio ta traha huntu den caso di un incidente di siguridad.
A test colaboracion y procedimiento
Durante e ehensicio nan a test diferente componente di e plan di siguridad di haaf di Boneiro. Esaki a encera entre otro evaluacion di e plan y testmento di e procedimiento pa alsa e nivel di siguridad operacional, na momento cu un situacion ta requeri esaki. Nan a test tambe e comunicacion y colaboracion entre e barco y autoridadnan na tera. Banda di esaki un evacuacion hipotetico di pasahero a forma parti di e ehensicio, di tal manera cu e ekiponan por a test e procedimientonan bou di presion.
Un parti importante di e ehensicio a enfoca riba colaboracion entre e diferente instancianan y servicionan di auxilio na Boneiro, entre otro polis, Koninklijke Marechaussee (KMar), hospital y cuerpo di bombero. Durante e ehensicio nan a investiga con e diferente organisacionnan ta intercambia informacion, reparti tarea y traha huntu durante un incidente.
E participantenan a entrena tambe con nan por baha e nivel di siguridad operacional, asina cu e situacion ta bou di control. Banda di esaki nan a dedica atencion na prevencion y medidanan cu por yuda reduci riesgo pa incidentenan di siguridad similar.
Exigencia anual
A base di e instruccionnan di siguridad vigente, nos haaf tin obligacion pa regularmente mehora y ecuta e tipo di ehensicionan aki. Por lo menos un biaha pa aña mester tene un ehensicio, y e periodo entre dos ehensicio no tin mag di ta mas largo cu 18 luna. Pa medio di e ehensicionan aki haaf di Boneiro ta sigui fortalece su preparacion pa posibel incidentenan di siguridad y mehora e colaboracion entre tur partidonan envolvi.
Capitan di Haaf a declara: “E ehensicio aki ta yuda nos fortalece siguridad di haaf di Boneiro mas aleu y mehora nos preparacion pa potencial incidentenan di siguridad.”