ORANJESTAD, Aruba
Oficina di Turismo di Aruba (A.T.A.) a introduci un total di tres sector adicional cu tambe lo mester completa e programa di Aruba Health and Happiness Code (HH Code). E tres sectornan adicional ta inclui ‘Spa & Salon’, ‘Watersports’ y ‘Casinos’. A.T.A. conhuntamente cu Departamento di Salud Publico (D.V.G.) a lansa e programa di Aruba Health and Happiness Code (HH Code) cu e meta pa sigura cu protocolnan di higiena y salud ta na un nivel cu nos bishitantenan ta spera ora di bishita un destinacion turistico manera Aruba.
A.T.A. a introduci e tres sectornan adicional di ‘Spa & Salon’, ‘Watersports’ y ‘Casino’ cu tambe lo mester registra pa e programa di HH Code cu e meta pa completa esaki dentro di dos siman, pues no mas tarda cu 1 di juli. Manera tabata e caso cu e sectornan anterior, e sectornan adicional tambe lo mester completa e dos fasenan di e programa di HH Code. E prome fase ta consisti di un registracion y checklist cu lo mester wordo yena via www.arubacovid19.org.
Durante e prome cuatro simannan despues cu e programa di HH Code a wordo lansa, un total di 1603 compania den e shete sectornan di ‘Accommodations’, ‘Food & Beverage’, ‘Food Trucks’, ‘Retail/Shops/Supermarkets’, ‘Tour Operators, ‘Car Rentals’ y ‘Taxi’ a exitosamente pasa e prome fase di e programa pa cual nan ta wordo otorga un seyo colorido di HH Code, cual ta e seyo di pre-check. Tur compania, cu excepcion di taxistanan, a ricibi un email confirmando esaki y indicando riba ki fecha lo por pasa busca e seyo di pre-check. Ta hasi un apelacion na tur compania cu a registra pa verifica si a ricibi e email aki, mirando cu esaki lo por a bay den ‘junk mail’. Taxistanan cu a yena e registracion y checklist debidamente den transcurso di e siman tras di lomba pronto lo ricibi un email di confirmacion caminda lo indica e fecha riba cual lo por pasa busca e seyo di pre-check.
Pa mas informacion tocante e HH Code y con pa registra por bishita www.arubacovid19.org/ahhc of por manda un email na healthcode@aruba.com.