Resientemente a tuma lugà un momentu importante entre e hermana islanan Aruba, Boneiru i Kòrsou, kaminda a firma un akuerdo pa ekstendé e “MoU” (Memorandum of Understanding) relashoná ku e Weganan Interinsular ku kuater aña mas.
Na aña 2022 mandatarionan di e islanan Aruba, Boneiru i Kòrsou a firma e promé “MoU” na Boneiru pa un durashon di tres aña, ku awor akí a kaduká.
E tres añanan akí tabata sumamente fruktífero i eksitoso pa hopi hóben atleta di Aruba, Boneiru i Kòrsou.
E promé tres deportenan pa loke ta trata e Weganan Interinsular lo ranka sali na Boneiru den luna di februari 2026. Despues ta turno pa hermana isla Kòrsou ta anfitrion i den luna di mart e Weganan Interinsular ta finalisá na Aruba.
Un danki ta bai pa diputado Peter Silberie, minister Sithree van Heydoorn i minister Gerlien Croes pa a firma e akuerdo pa asina por sigurá ku e hermandat ku e Weganan Interinsular ta sòru p’e, por kontinuá pa kuater aña mas pa nos hóben atletanan di Aruba, Boneiru i Kòrsou.
Press release: Gobièrnu di Boneiru
