Ayera riba proposishon di frakshon di MPB a nombra Elvis Tjin Asjoe komo diputado. For di awor e ta tuma kartera di e anterior diputado Nina den Heyer na su enkargo.
Te na formashon di un koalishon nobo despues di e próksimo elekshon, Tjin Asjoe lo ta enkargá ku entre otro failnan riba tereno di asuntunan sosial i bienestar, kuido di salubridat públiko, asuntunan laboral, kultura, enseñansa i bibienda popular. Na su lugá a nombra Richèna di Windt-Look komo miembro di Konseho Insular.
‘Riba algun di e áreanan akí aktualmente hopi kos ta tuma lugá na Den Haag. No ku riba término kòrtiku ta bai tuma desishonnan grandi, pero ta importante sí pa nos keda riba e kosnan akí, pa evitá ku den kurso di otro aña nos ta haña nos konfrontá ku eskohonan ku nos no a partisipá den kòmbersashon tokante di nan’, segun diputado Tjin Asjoe.