Art Culture Education Foundation ta anunsiá ku inskripshon a habri pa e periodo nobo di ACE Art Academy. ACE Art Acedmy ta e parti edukativo den kua ACE Foundation ta organisá diferente tayer i lèsnan di arte i kultura den diferente disiplina i proyekto. ACE Art Academy ta konsistí di tres proyekto prinsipal. ACE Kids Club pa muchanan di 4 te ku 8 aña, ACE Tweens pa muchanan di 9 te ku 12 aña, i Gang di Arte Bonaire ku ta pa hóbennan di 13 t/k 19 aña. Awe a habri inskripshon pa ACE Kids Club i ACE Tweens Club.
ACE Kids Club
ACE Kids Club tabata un di e promé proyektonan di ACE Foundation kaminda ku vários mucha ku a kuminsá e tempu ei a sigui segun transkurso di añanan, segun nan a krese pa ACE Tweens ku a ser introdusí den 2023. ACE Kids Club a forma parti di diferente proyekto manera entre otro Siman di Muzik pa Mucha i Siman di Buki pa Mucha. Tambe nan a traha diferente kantika i video-klepnan pa mucha i tambe showman teatral. Awor ACE Foundation ta kla pa kuminsá ku un grupo nobo di ACE Kids Club kaminda ku nan lo haña lèsnan di baile, drama, kanto i mas.
ACE Tweens Club
ACE Tweens Club a keda ofisialmente lansa na luna di Mei 2023 i a mira e grupo aki konkista kurason di pueblo tantu na Boneiru komo na Aruba kaminda ku nan presentá entre otro den show final di Gang di Arte Aruba i tambe na Tele Aruba. Na Boneiru nan a hasi diferente presentashon, a saka kantikanan nobo i tambe un video-klep titulá “Boneiru ta mi kas” komo parti di e proyekto di Siman di Buki pa Mucha 2023.
Formashon Sosial i Emoshonal
Den e mundu di artístiko hopi bia e artista ta wòrdu konfrontá ku situashon nan òf desishonnan ku mester tuma ku por impaktá nan trayekto seya positivo òf negativo. Esei ta e motibu pa kiko Formashon Sosial i Emoshonal ta e sentral den tur nos proyektonan. Ta importante pa e futuro artista rekonosé i komprondé emoshonnan propio i di personanan rondó di dje. Ta importante pa e artista konosé su mes bon i ta sigur di su mes i su metanan ku e ke alkansá.
Inskripshon
Pa inskribí pa ACE Art Acadmy su siguiente periodo por tuma kontakto ku ACE Foundation na number di telefòn +599790-0155 (disponibel tambe via Whatsapp) òf por bishitá nos paginá Facebook ACE Bonaire kaminda ku tur informashon lo ta disponibel. Tene kuenta ku inskripshon ta sera Djabierne 1e di mart 2024. E periodo aki lo kore di mart te ku yüli 2024.