Aruba Hotel & Tourism Association (AHATA) a demostra aprecio y inspira orguyo pa e hobennan studiando na Scol Practico pa Ofishi (SPO) Santa Cruz. Presidente y CEO di AHATA, Sra. Tisa LaSorte a haci e bishita pa combersa cu studiantenan, contesta pregunta y regala T-shirts di e campaña “Ami Ta Turismo”.
Durante e bishita 38 studiante di ultimo aña, den diferente area di servicio como cushina, comercio y hardineria a siña mas tocante di nos industria turistico. AHATA a regala e t-shirts di “Ami Ta Turismo” den presencia di alumnonan y Management di SPO Santa Cruz representa pa Janine Wardlaw-Thiel, na e hobennan cu lo bira e siguiente generacion di profesionalnan den nos industria turistico. E intencion di e campaña ta pa inspira orguyo pa escogencia di hospitalidad como carera.
E bishita y regalo ta un indicacion di AHATA su compromiso pa crea mas conscientisacion den nos comunidad, specialmente hobennan. Pa asina ta bon informa di e diferente oportunidadnan cu tin den nos sector turistico pa un bon carera y calidad di bida. E asociasion ta spera cu e bishita aki lo sirbi como un recordatorio di e rol importante cada un di e studiantenan tin den sostene nos isla su economia y inspira nan pa sigui nan estudio y un carera valioso den turismo.
