Aruba Hotel & Tourism Association (AHATA) ta continua cu nan compromiso pa apoya studiantenan cu un donacion di AFL 10.000 pa Stichting Sociaal Fonds Colegio Arubano. E contribucion ta forma parti di e esfuerzonan di AHATA pa inverti den varios iniciativa di diferente scol pa asina haci e campo educativo mas accesibel y yuda mas studiante alcansa nan aspiracion academico.
E donacion a ser presenta pa Presidente y CEO di AHATA, Sra. Tisa LaSorte, na dos miembro di hunta di Sociaal Fonds Colegio Arubano, Sra. Milaidy Kelly y Sra. Ann Navas. E fundacion tin como mision pa yuda studiantenan enfrentando limitacion financiero cu sosten pa cubri nan necesidadnan basico. Di e manera aki, e fundacion ta inverti den e futuro di studiantenan, ta alivia carga financiero y asegura cu mas studiante por finalisa nan estudio secundario na Colegio Arubano.
Sra. LaSorte a enfatisa e importancia di e fundacion su trabou, y ta contento cu e contribucion lo brinda studiantenan cu un miho oportunidad pa desaroya nan mes den un ambiente di estudio cu ta cultiva talento y potencial pa tur alumno.
AHATA ta keda firme den nan planes pa sigui aporta na un educacion mas accesibel. Durante e ultimo lunanan, e asociacion a duna sosten na diferente instituto di educacion pa asina crea un impacto positivo den e preparacion di nos studiantenan y di futuro forsa laboral.