Ta cu gran tristeza e comunidad di Aruba a nota e accidente fatal ayera den lama dilanti Palm Beach. Aruba Hotel and Tourism Association ta expresa profundo condolencia na e famia cu a yega nos isla pa goza hunto y a perde nan yiu muher tragicamente. Nos ta gradici y aprecia e first responders cu a hasi tur esfuerzo posibel pa yuda scapa bida di e hobencita.
AHATA ta boga pa Aruba implementa un plan integral pa regula y controla e trafico maritimo na nos beachnan popular. Mescos cu a recomenda pa hopi aña pa gobierno introduci regulacion y control di vehiculo di tour riba tera (UTV/ATV), AHATA ta boga pa regulacion efectivo y control intenso riba nos beach publico y riba lama.
AHATA lo sigui dialoga cu y apoya autoridadnan local pa yuda yega na un maneho efectivo cu ta sigura proteccion di personanan cu ta disfruta di nos beach y lama.