Aruba Aquatics Federation (AAF) anteriormente conoci como AZB (Arubaanse Zwem Bond) tin e honor y placer di anuncia cu e lo ta anfitrion di e “UANA Pan American Artistic Swimming Championships” pa prome biaha na Aruba. E evento aki ta reconoci como e competencia pa “age group” mas importante den e region di Americas y Caribe. Ademas e aña aki ta fungi como e qualifier pa Junior Pan Am Games cu lo tuma lugar na Colombia na september.
UANA, e organo mas halto di e continente Americano pa e deportenan acuatico, ta afilia na FINA. FINA ta e Federacion International cu ta representa tur deporte acuatico y ta representa esaki den Comite Olimpico International. Cuater region ta forma UANA: Merca, Canada, CONSANAT, cu ta e paisnan Suramericano y CCCAN, cu ta representa e paisnan di Caribe, Central America y Mexico. Na timon di UANA tin un Arubiano, Sra. Maureen Croes como presidente locual ta hasi e evento aki mas importante aun pa nos isla.
Despues di tres competencia exitoso cu a yega di organisa na Aruba anteriormente CISC (2012), Carifta (2014) y CCCAN (2018) atrobe nos ta bira e cede di un competencia di e tayer aki y ta trahando duro pa hasie uno exitoso. Sr. Randy Arends presidente di AAF ta comparti: “Nos ta reconoce e prestigio di organisa e evento internacional aki y e federacion, club, partners y voluntarionan ta sumamente entusiasma pa yama bon bini na UANA pa prome biaha na Aruba.”
Despues di a gana e bid, e evento lo mester a tuma lugar na september 2020, pero debi na e situacion di COVID -19 esaki no a sosode y a wordo postponi. Awor por sigui cu e evento, pero sin publico. E comishon organisatorio a confirma cu lo yama bon bini un total di 120 atleta di 11 diferente pais, entre otro USA, Puerto Rico, Guatemala, Cuba, Mexico, Chile, Republica Dominicana, y El Salvador. Mas cu claro nos atletanan di Aruba lo representa nan isla cu orguyo akinan mes na cas. Aruba lo tin representacion den tur categoria y lo competi den mayoria evento entro otro solo, duet, mix duet, team y combo. Pa mas informacion por bishita e website www.uana2021.org
Un relato amplio lo ser dedica na e seleccion di Aruba, pero por cuminsa sera conoci cu nos atletanan atraves di e facebook page di AAF: facebook.com/arubaaquatics of Barracudas Aruba: facebook.com/barracudas.aruba
Team 12&U: Christofer De Freijtas, Caithlyine Kock, Daniela Muñoz, Xia Rodriguez, Kendra Simon, Manuela Sosa Lopez-Henriquez, Valentina Wong, Xiana Hoo y Katiana Vizhco.
Team 13-15: Harianny Abreu, Sofia Cardona, Silvana Cardona, Alina Dirksz, Amylene Helder, Hildeswind Kluiving, Emylaine Mathilda, Abizahi Sanchez y Camila Tromp.
Team Junior: Edianne Croes, Angelina Hamoen, Janelly Piña, Mariajose Salazar, Avigayle Tromp, Meghan Tromp y Melanie Tromp
Senior Athlete: Kyra Hoevertsz
E hotel anfitrion di UANA 2021 lo ta Hyatt Place Aruba, y partner oficial di transporte lo ta Fofoti Tours & Transfers. Nos ta gradici tur sponsor cu a yuda di un manera of otro te cu ainda: Aruba Tourism Authority (ATA), Setar N.V., Caribbean Mercantile Bank (CMB) y Pan American Life. Nos lo ta asercando diferente instancia pa mas ayudo y lo aprecia cualkier sosten pa cubri gastonan di medaya, shipping cost, cuminda pa voluntarionan y infrastructura, entre otro. Ta hasi un apelacion na tur voluntario cu ta desea di forma parti di e magno evento aki pa registra via e link: https://forms.gle/JRtmjNC3CxFqmVY79
