Diaranson 9 di maart ultimo Organo Ehecutivo AZV (OE AZV) a tene su prome sesion informativo pa su dunadonan di cuido cu e meta pa comparti cifranan clave di Fondo AZV incluyendo e preocupacion di OE AZV tocante topiconan manera envehecimento, migracion y kico e gastonan di cuido ta nifica den e ‘Producto Interno Bruto’ di pais Aruba.
Presentacion
A habri e anochi cu e historia di AZV pa medio di un documentario sigui pa dos presentacion. Oradora Merrel Curie tabata esun encarga cu e prome presentacion. Aki ta unda su persona a trece dilanti e tarea di OE AZV pa cumpli cu e ordo di recorte di 60 miyon florin den 2022. Señora Merrel Curie a splica cu ya for di inicio di e pandemia e reforma a cuminsa tuma luga door di aplica cambionan pafo di Ley AZV. Awor su presentacion a duna bista den e modelo cu ta bay wordo uza pa ehecucion di e cambionan cu ta rekeri den cambio den e Ley AZV. A presenta e proyecto implementacion incluyendo e splicacion di unda OE AZV ta para awor aki. E segundo presentacion tabata den man di director Edwin Jacobs. Su persona a elabora riba e necesidad pa reforma. El a comparti su preocupacion pa cu e situacion y presion riba nos sistema di seguro social, envehecimento como tambe e impacto di tur e gastonan aki interpreta den e porcentahe di “GDP” (Producto Interno Bruto) di Aruba. Durante su presentacion tabata enfoca constantemente riba e punto di salida principal di Ley AZV, e solidaridad y meta colectivo; esta e necesidad pa reforma sector medico pa garantisa cu awe y mañan ken cu bira malo por haya su tratamento medico. Director Edwin Jacobs a finalisa su presentacion cu e peticion urgente na tur dunado di cuido pa tuma nota di e reporte di investigacion di profesor Hubben y consorcio (28 di februari 2022) y pa hunto cumpli cu e recorte. Den futuro cercano ora situacion financiero di Aruba drecha lo por pensa bek riba inverti den cuido medico.
Reaccion den sala
E dunadonan di cuido presente a vocifera nan preocupacion tocante e reforma, entre otro e preocupacion si e reforma lo resulta den un sistema menos accesibel pa pashent, con lo haci cu e contribucion propio ora e pashent no por paga esaki y e pregunta si cuido medico lo keda uno realisabel si ya caba ta sinti presion di tur caminda. Esnan presente a pidi atencion e.o. pa topiconan manera prevencion, e lista positivo di remedi y pashentnan ‘no show’. OE AZV ta compromete su mes pa haci su maximo esfuerzo pa encamina e trayecto di implementacion mas miho cu ta posibel. Un gradicimento pa tur dunado di cuido cu tabata presente na e sesion.
