INDEBON i gobièrnu a risibí nos kampeonnan di selekshon di beisbòl U9 ku kariño i orguyo na nan yegada. E kampeonnan a yega Boneiru djárason 14 di mei 2025 den oranan di anochi. Nos atletanan hubenil a logra di gana di Puerto Rico den un wega basta tenso durante e pre mundial di beisbòl ku a tuma lugá na Colombia. Ku e viktoria akí, Boneiru su selekshon di U9 a klasifiká pa partisipá na mundial di U9 Pony Baseball na California, Merka 25 pa 28 di jüli.
Terrence de Jongh, hefe di INDEBON, i diputado Nina den Heyer ta sumamente kontentu i orguyoso ku e logro di nos hóbennan. Nan ta di opinion ku nos kampeonnan hubenil a demostrá ku nos hóbennan boneriano por logra hopi den deporte. Nan ta kapas di gana di ekipo di pais grandi ku kisas tin mas fasilidat deportivo ku nos aki na Boneiru. Gobièrnu i INDEBON ta kere den potensial di nos atletanan hóben i ta sigui sostené nan pa nan por krese mas ainda den na ramo di deporte.
