Mas ku 140 konsehero di biahe ta haña treinen pa bira Eksperto di Boneiru
Tourism Corporation Bonaire (TCB) a partisipá na e Travel Counsellors Suppliers Day na Tiel, Hulanda, komo parti di su Plan di akshon di merkadeo 2022 ku komo meta pa duna nos konseheronan di biahe internashonal informashon tokante e vishon i e oferta di Boneiru. Un di e mensahenan mas importante ta nos vishon riba ‘high-value, low-impact tourism’ (turismo di balor haltu ku tiki impakto): redefiní Boneiru komo un destinashon ‘premium’ i úniko.
Travel Counsellors ta fungi komo un ‘liaison’, un persona di konekshon, ku ta konektá e biahero korekto na e destinashonnan korekto tur kaminda na mundu ku ta pas den e vishon di Boneiru pa futuro. Travel Counsellors a organisá nan dia di suministradó ku partisipashon di mas ku 140 konsehero di biahe i 21 partner komersial ku 35 representante.
Durante e evento akí TCB tabatin e posibilidat pa duna un seri di tayer na un kantidat grandi di agente di biahe ‘premium’ ku ta dirigí nan mes riba destinashonnan ku ta enfoká riba e manera ku e biahero ta eksperensiá e destinashon. Durante e mas ku 10 rònt di e tayernan ku ta dura 12 minüt, TCB a duna splikashon tokante e karakterístikanan úniko di benta di nos isla i a hiba kòmbersashonnan fruktífero ku e agentenan tokante diferente desaroyo na Boneiru. E sintimentu en general tabata hopi positivo. E agentenan tabata hopi kontentu ku e desaroyonan resien na Boneiru i ku presensia di TCB na e evento.
Ryan Hart, liaison na Oropa pa Tourism Corporation Bonaire, a bisa: “Despues di mas ku dos aña Travel Counselors a duna nos un kaluroso bon biní. Nos tabata kontentu ku e agentenan asina entusiasmá i motivá. Nos ta hopi felis ku nos por a presentá Boneiru na un otro evento ‘live’ atrobe. I ta emoshonante pa mira mas i mas embahador pa Boneiru ku awor akí nos ta konsiderá komo Eksperto di Boneiru.”
