Un biaha mas habitantenan di Boneiru a hasi uso di nan derecho importante pa vota durante e Elekshon di Tweede Kamer ku a tuma lugá dia 29 di òktober 2025. Votashon ta un momentu importante kaminda habitantenan por laga skucha nan bos tokante futuro di Hulanda i Hulanda Karibense.
Pa duna habitantenan sosten na momentu di determiná pa ken nan ke vota, a desaroyá e ‘KiesKompas’ Hulanda Karibense. E hèrmènt online pa votashon akí tabatin komo meta pa yuda habitantenan di Boneiru, Sint Eustatius i Saba hasi un eskoho konsiente durante e elekshon.
E aña akí 15.578 habitante tabatin derecho di voto na Boneiru. En total 3.294 habitante a bai vota, loke ta nifiká un asistensia di 21,5%. Na aña 2023 esaki tabata 4.037. E elekshon a bai trankil i nèchi, i e organisashon a kana bon.
Kordinashon di e elekshon tabata den man di departamento di Asuntu Sivil di Entidat Públiko Boneiru. Entidat Públiko Boneiru ta gradisí tur miembro di e urnanan elektoral i tur boluntario i empleado ku a duna un aporte pa e elekshon a kana bon. Danki na nan dedikashon, habitantenan por a vota na un manera seif i sin problema.
Riba nivel nashonal D66 a resultá ganadó di e Elekshon di Tweede Kamer 2025.
Finalmente departamento di Asuntu Sivil di Entidat Públiko Boneiru i Konseho Elektoral lo partisipá na un momentu di evaluashon. Durante e konsulta akí nan ta deliberá tokante e eksperensianan i puntonan importante di Boneiru, di manera ku por hasi uso di esakinan durante próksimo elekshonnan.
Press release: Gobièrnu di Boneiru