Pa añanan largo, e imagen di Maxi Lont ambulando riba e cayanan di Aruba a bira un recordatorio palpabel di e crueldad di adiccion y e desamparo social. Su historia, mescos cu esun di hopi otro ciudadanonan den mesun situacion, no ta simplemente un tragedia personal, sino e prueba mas evidente di un sistema institucional cu a perde su rumbo y su compas moral.Fundacionnan y departamento di Asunto Social cu Pueblo di Aruba ta paga no ta funciona.
Aruba ta conta cu un red di fundacionnan cu ta ricibi subsidio y un Departamento di Asuntonan Social cu tin e mandato legal y moral pa proteha y yuda esnan mas vulnerabel den nos comunidad. Sinembargo, mientras miyones di florin ta keda inverti aña tras aña den structuranan gubernamental, e echo riba caya ta papia un idioma completamente diferente: e asistencia directo pa esnan mas den necesidad ta laga hopi di desea.
Un obligacion, no un fabor
E punto di salida cu hopi biaha ta keda lubida den e edificionan grandi di gobierno ta simpel: e salarionan di e directornan, ambtenaarnan y personal di e departamentonan aki ta wordo paga directamente pa e pueblo di Aruba atrabes di nan impuestonan. E asistencia cu un ciudadano den crisis mester ricibi no ta un fabor personal di un funcionario, sino un obligacion di e Estado y e aparato gubernamental.
Pueblo ta paga pa un servicio cu, den e casonan mas critico manera esun di Maxi Lont, simplemente no ta yega ora e ta mas necesario. E pregunta fundamental cu e sociedad aki mester haci su mes ta: pa kico un departamento of fundacion ta existi si e no ta fungi pa cumpli cu e meta pa cual el a wordo crea?
Arogancia y e falta di empatia den burocracia
Maneho social no ta wordo haci di tras di un lessenaar den un oficina cu aire acondiciona. Lamentablemente, e mentalidad den parti di e aparato gubernamental a bira uno di “wrong and strong”, caminda ta pretende cu e responsabilidad no ta di nan, of caminda e ciudadano mester roga pa haya un asistencia cu legalmente y humanamente ta corresponde.
E actitud di arogancia di algun funcionario ta refleha un problema mas profundo: un alma di servicio cu ta putri e celebro di e posicionnan di liderazgo y maneho. Mientras cu ta organisa conferencianan di prensa, show y presentacionnan bunita riba papel, riba caya e realidad ta keda crueldad puro. E pueblo di Aruba ta cansa di palabra y show; e ta exigi echo concreto.
Mester haci un limpieza profundo y structural den e aparato gubernamental pa recorda tur ambtenaar cu nan ta na servicio di e pueblo, y no lo contrario.
Maxi Lont ta un ciudadano di Aruba
Maxi Lont ta un serhumano. E ta un ciudadano di e pais aki cu mesun derechonan fundamental cu cualkier otro persona cu ta biba na Aruba. Su condicion di adiccion no ta kita su dignidad humano ni ta descalific’e di ricibi e proteccion di e mesun sistema cu e pueblo aki ta financia.
Trata esnan mas vulnerabel cu indiferencia ta e señal mas claro di e decadencia di un sistema social. E caso di Maxi Lont mester sirbi como un yamada di atencion urgente ora e structura cu mester salba bida ta bira un muraya di burocracia, ta e momento pa haci cambionan drastico y reevalua pa ken realmente e departamentonan aki ta traha.
Banda di esaki tin un minister na cabes, pero e responsabilidad di cada departamentonan tin un cabes cu mester responsabilisa su mes pa e departamento drey manera mester ta y si tin fayo trece esaki na e mandatario y trece solucionnan , pero e brug aki ta wordo haci realmente pa e mandatario por actua?