Ministerio Publico a recientemente cera un acuerdo di transaccion den e caso Flamingo contra e sospechoso Humprey Anthony Croes pa un suma di Afl. 25.000.
Croes ta wordo sospecha di a soborna activamente un trahador di oficina di Minister di Desaroyo di Espacio, Infrastructura y Medio ambiente (ROIM) den e periodo di November 2017 te Augustus 2020. E multa maximo cu segun Codico Penal di Aruba por wordo impone pa e delito aki ta Afl. 25.000. Por lo tanto, e total di e transaccion cu a wordo acorda ta igual na e multa maximo.
Ministerio Publico ta opina cu tin suficiente evidencia contra Croes y cu e hecho di cual e ta wordo culpa por tambe wordo comproba. Considerando tur hecho y circunstancia, incluso e hecho cu no tin victima of partinan perhudica di kendenan nan interesnan lo por wordo perhudica dor di realiza un transaccion, Ministerio Publico ta mira e transaccion menciona como un solucion adecua pa Croes.
Ministerio Publico tambe a tene cuenta cu acuerdo cera den casonan similar. Ministerio Publico ta di opinion cu e suma total di e transaccion ta haci husticia na e hechonan y na e rol specifico cu Croes a hunga den e caso penal Flamingo. Tanto Ministerio Publico como Croes ta considera cu e transaccion aki ta un solucion adecua di e caso penal.
Ministerio Publico ta enfatiza cu e transaccion aki no ta afecta e curso di e proceso penal contra e otro sospechosonan den e caso. Si Croes no cumpli cu e condicionnan cu a wordo acorda, e tambe lo wordo cita pa huicio.