Minister di Husticia, Integracion, Transporte Publico y Energia, mr. drs. Arthur Dowers, a
haci un bishita na e facilidadnan di Guarda Nos Costa na FOL y Dakota. E bishita aki ta
parti di e esfuerso continuo pa mehora y modernisa e facilidadnan di detencion di
personanan indocumenta cu ta pendiente nan deportacion.
Despues di su bishita na Inmigracion na aeropuerto, Minister Dowers a bay na FOL, cu
ta ubica banda di Brandweer Airport, pa constata personalmente e resultado di e
trabaonan di renobacion cu a tuma luga despues cu e edificio a deteriora pa falta di
vision y inversion durante e ultimo gobernacion.
Apenas algun luna atras, e propio Minister Dowers a haci un bishita di sorpresa na e
facilidad y a mira cu e proceso di renobacion tabata canando. Awe, e celnan di
detencion ta practicamente cla pa bay den uzo. Parti di e personal di Guarda Nos
Costa, cu tabata traha na e centro di detencion na Dakota, ya a muda pa FOL y ta
drechando e oficinanan pa asina dentro di poco nan por ta 100% operacional for di e
localidad nobo.
E modernisacion aki no ta solamente infrastructural, pero tambe institucional. Ta di
sumo importancia cu e facilidadnan di detencion ta cumpli cu e normanan internacional
di derecho humano, mas ainda den caso di famianan cu tin yiu cu ta pendiente
deportacion. Condicionnan digno, espacio adecua, ventilacion, higiene y separacion
apropia ta parti esencial di un sistema responsabel y humano.
Mientrastanto, trabaonan di preparacion ta andando na Centro di Detencion na Dakota,
pa haci uzo di e facilidad aki pa detene adictonan ambulante cu ta cay den man di
husticia. Aki, bao supervision di profesionalnan den e ramo di maneho di adiccion, e
adictonan den detencion lo ricibi tratamento y guia, cu e meta pa alivia e problema di
abuso di substancia cu ta bayendo for di control pa basta aña caba y cu mester
atencion urgente.
Minister Dowers a keda satisfecho pa mira e progreso concreto na e facilidadnan aki y
e entusiasmo di e personal di Guarda Nos Costa pa haya un facilidad completamente
renoba, cu ta responde na e exigencianan actual di siguridad, humanidad y
profesionalismo.
E bishitanan aki ta confirma e compromiso di e minister pa fortalece e infrastructura di
control y detencion den nos pais, cu balor pa dignidad humano, responsabilidad y
cumplimento cu normanan internacional.