Mas di cuarenta analista y specialista riba tereno di criminologia, proveniente di mas of menos binti pais y isla den Caribe, a reuni hunto na Santo Domingo pa e di tres encuentro regional Regionale Netwerkbijeenkomst voor Analisten (RNA).
E aña aki e tema tabata: STRATEGIC INSIGHTS: CRIMINAL NETWORKS, FINANCIAL CRIME, DRUG FLOWS AND THE ROLE OF AI. Colegio di Hefenan di Polis di e cuater cuerponan di polis den e Reino Hulandes den Caribe a organisa e evento cu e meta pa stimula cooperacion regional den e lucha contra crimen transfronteriso.
Apertura di e encuentro tabata na man di Leonne van Vlimmeren, embahador suplente di Reino Hulandes pa Republica Dominicana; vicealmirante José Manuel Cabrera Ulloa, hefe di Direccion Nacional de Control de Drogas (DNCD); y Raymond Ellis, hefe di polis di Corsou y representante di Colegio di Hefenan di Polis. Van Vlimmeren a referi na RNA como “un foro unico caminda analista por siña conoce otro miho, reconoce patronchi y duna sosten transfronteriso.” Cabrera Ulloa a enfatisa cu crimen organisa ta move rapidamente di un pais pa otro y cu “nos reaccion mester ta coordina, bon fundamenta y basa riba informacion cu nos ta comparti.” Ellis a añade: “Analista ta combina informacion pa duna un bista cla. Ora analistanan di diferente isla ta traha hunto, rednan criminal ta perde un di nan bentaha principal: fragmentacion.”
Durante tres dia, analistanan di Anguilla, Antigua & Barbuda, Aruba, Boneiro, Corsou, Francia, Guyana, Hulanda, Cayman Islands, Jamaica, Republica Dominicana, Saint Martin, Sint Maarten, Saint Lucia, Surinam, Trinidad & Tobago, US Virgin Islands y British Virgin Islands a presenta nan analisis mas reciente. Hunto, tur e contribucionnan a duna un bista amplio y detaya riba criminalidad den nos region: tiroteo, cifra di asesinato, trafico di droga, violencia hubenil, uzo di zona vulnerabel na costa, cooperacion entre rednan criminal di diferente isla, crimen cibernetico y e papel cada bes mas importante di Inteligencia Artificial (IA) y plataforma online.
Tabatin tambe presentacionnan cu a pone e desaroyonan aki den un contexto global. Dr. Evan Ellis a bisa con cambio geopolitico ta impacta e region di Caribe, di manera cu nos region ta bira no solamente un ruta di transito, sino un parti integral den cadena logistico di cocaina y otro mercancia ilegal. Specialistanan di Global Initiative Against Transnational Organized Crime (GI-TOC) a mustra con Caribe a bira un plataforma pa almacena, re-empaketa y redistribui cocaina, y a pone enfasis riba e relacion estrecho cu tin entre trafico di droga y arma di candela.
E papel di tecnologia y inteligencia tabata central den e contribucionnan di John Bloebaum y Thom Snaphaan. Nan a mustra cu pa por haci analisis di calidad, ta importante pa formula preguntanan operativo den un manera skerpi, y cu “financial crime scripting” por yuda detecta operacion di labamento di placa y fraude.
Assistant Commissioner Leonardo Brown, hefe di departamento tecnologico di Jamaica Constabulary Force (JCF), a presenta desaroyo di recurso digital den JCF. Representando CARICOM IMPACS, Terrance Roopchan, hefe di e unidad di inteligencia contra crimen, arma di candela y gang y tambe e unidad di apoyo operacional di Regional Intelligence Fusion Centre, junto cu Dale Joseph, analista hefe di Cyber Fusion Unit, a discuti tendencia actual den trafico di arma di candela, formacion di gang y crimen cibernetico.
Angelo Brete, hefe di FIU Aruba, a duna un perspectiva financiero, mustrando con transaccion poco usual ta yuda identifica labamento di placa den diferente sector, manera real estate, wega di placa, comercio internacional y mas.
E evento tabatin un mensahe central bien cla: Menasa regional ta pidi un acercamento regional. E analistanan ta nota con facilidad cu arma di candela ta move di un isla pa otro, con medionan social ta pone grupo hubenil di diferente isla den contacto, con rutanan di droga ta cambia rapidamente ora presion aumenta, y con criminalidad ta probecha di buraconan den cooperacion. RNA ta yuda cera e buraconan aki, reforsando contacto personal, agilizando comunicacion, dunando acceso na metodonan analitico y permitiendo un bista comun riba patronchinan cu ta surgi.
Colegio di Hefenan di Polis a cera e evento reafirmando cu RNA lo sigui desaroya como plataforma regional anual. Manera CARICOM IMPACS a expresa: “Colaboracion no ta costa nada, fragmentacion si.” E edicion di 2026 tambe lo wordo organisa den colaboracion estrecho cu partnernan regional.
Press Release Colegio di Hefenan di Polis
